ბაჩო ახალაიას წიგნის პრეზენტაციის გასაპროტესტებლად მოსახლეობა მოტყუებით მიიყვანეს

პოლიტიკა - 15:54, 31 Jan, 2015

3255

დღეს ზუგდიდის ცენტრში, იუსტიციის სახლის გვერდით მდებარე სკვერში, ადგილობრივმა ხელისუფლებამ აქცია გამართა, აქციის ძირითადი ორგანიზატორები და წამყვანები იყვნენ ,,ქართული ოცნების“ საარჩევნო შტაბის ხელმძღვანელი ლაშა გვასალია, ზუგდიდის საკრებულოის თავმჯდომარე მერაბ ქვარაია, ზუგდიდის რაიონის საკრებულოს თავმჯდომარე ლაშა გოგია და მერიისა და გუბერნიის საჯარო მოხელეები და მათი ოჯახის წევრები.

გავრცელებული ინფორმაციით, ზუგდიდის ხელისუფლებამ აქციაზე ხალხის მოსაყვანად რაიონის გამგებლებს დაავალა თითო რაიონიდან 10 მიკროავტობუსით ჩამოეყვანათ მოსახლეობა, თავად მოსახლეობას კი მიაწოდეს ინფორმაცია, რომ ისინი ზუგდიდში პრემიერთან შესახვედრად მიჰყავდათ.

სოფლებიდან მიკროავტობუსებით ჩამოსულმა ადამიანებმა ადგილზე გაარკვიეს რომ აქცია არა პრემიერის დასახვედრად, არამედ ბაჩო ახალაიას წიგნის „სოხუმი-ჩემი იერუსალიმის“ პრეზენტაციის გასაპროტესტებლად იმართებოდა. ამის შემდეგ მათმა უმეტესმა ნაწილმა აქცია დატოვა.

აქციის ორგანიზატორებმა სცადეს აქციაზე დარჩენილი მცირერიცხოვანი ჯგუფის იმ შენობასთან გადაყვანა, სადაც წიგნის პრეზენტაცია მიმდინარეობდა, თუმცა ეს ვერ მოხერხდა.

აღნიშნულ ფაქტთან დაკავშირებით ბრიფინგი გამართა ყოფილმა გუბერნატორმა თენგიზ გუნავამ და აღნიშნა, რომ ამ აქციით ადგილობრივი ხელისუფლება და „ოცნება“ არა ბაჩო ახალაიას წიგნის პრეზენტაციას, არამედ სოხუმის დაბრუნებას ეწინააღმდეგება.

გავრცელებული ინფორმაციით ბაჩო ახალაიას წიგნის პრეზენტაციას 700-ზე მეტი ადამიანი ესწრებოდა, მათ შორის არის აფხაზეთიდან გადმოსული რამდენიმე ოჯახიც.

შენობასთან სადაც პრეზენტაცია იმართება, მობილიზებულნი იყვნენ სამართალდამცავებიც.