სასამართლომ თელავის საკრებულოს ოპოზიციის წევრების სარჩელი დააკმაყოფილა

პოლიტიკა - 14:42, 31 Jan, 2015

1257

თელავის მუნიციპალიტეტის საკრებულოს წევრებმა ლევან არჯევანიძემ („ნაციონალური მოძრაობა“), ბაადურ რევაზიშვილმა („ნაციონალური მოძრაობა“) და ნიკა ვარდოსანიძემ (ახალი მემარჯვენეები) 2014 წლის სექტემბერში საკრებულოს იურიდიულ კომისიას ოპოზიციური ფრაქციის შექმნის თაობაზე მიმართეს. რაზეც კომისიის უარყოფითი დასკვნის საფუძველზე, საკრებულომ უარი უთხრა და კენჭისყრაზე საკითხი ჩააგდო. რაც თავის მხრივ რევაზიშვილმა, არჯევანიძემ და ვარდოსანიძემ გაასაჩივრეს თელავის რაიონულ სასამართლოში და მოითხოვეს კომისიის დასკვნის, საკრებულოს გადაწყვეტილების და სხვა საქმესთან დაკავშირებული ნორმატიული აქტებისა თუ ბრძანებების ბათილად ცნობა და საკრებულოს ზემოთ ხსენებული წევრების მოთხოვნის შესაბამისად, ფრაქციის დაუყოვნებლივი რეგისტრაცია.

2015 წლის 30 იანვარს სასამართლომ დააკმაყოფილა სარჩელი კერძოდ, გააუქმა ამ საქმესთან დაკავშირებული საკრებულოს მიერ მიღებული გადაწყვეტილება და საკრებულოს დაავალა ფრაქციის რეგისტრაცია და სასამართლო ბაჟის გადახდა დააკისრა.

საკრებულოს აღნიშნული წევრების აზრით, სასამართლომ კანონიერი და სამართლიანი გადაწყვეტილება მიიღო. აღსანიშნავია ისიც, რომ ამ დრომდე თელავის საკრებულოში არც ერთი ფრაქცია არ არსებობდა რაც ყოვლად დაუშვებლად და არადემოკრატიულად აღიქმება საზოგადოების და არასამთავრობო ორგანიზაციების მიერ. როგორც ჩანს, ადგილობრივ თვითმმართველობას არ აწყობს საკრებულოში ძლიერი ოპოზიციური ფრაქცია და ყველა ღონეს ხმარობს, რომ ასეთი ფრაქცია არ არსებობდეს, რითიც არღვევს საკრებულოს წევრების უფლებებს და ზოგადად, დემოკრატიის პრინციპებს. საკრებულოს ოპოზიციის წევრები დარწმნულებულნი არიან, რომ სააპელაციო სასამართლო ძალაში დატოვებს თელავის რაიონის სასამართლოს გადაწყვეტილებას და ამით კიდევ ერთხელ შეირცხვენს თავს ხელისუფლება და წარმოაჩენს რომ თვითმმართველობებში არადემოკრატიული ნაბიჯებით უკანონო პოლიტიკურ ზეწოლას ახდენს ოპოზიციაზე.