,,ოკუპანტის მსახურება და პოლიტიკური უმეცრება“ - ივანიშვილის ინტერვიუს შესახებ

პოლიტიკა - 00:17, 31 Jan, 2015

3197

,,ილია ჭავჭავაძის“ საზოგადოების თავმჯდომარე, ყოფილი დისიდენტი თამარ ჩხეიძე ექსპრემიერის და საზოგადოება ,,მოქალაქის“ დამფუძნებლის ბიძინა ივანიშვილის ინტერვიუსთან დაკავშირებით სოციალურ ქსელში საკუთარ მოსაზრებებს აქვეყნებს.

,,ივანიშვილის ინტერვიუ მიუხედავად დემოკრატიულ ფასეულობებსა და ეროვნულ-სახელმწიფოებრივ ინტერესებზე აპელირებისა, სწორედ ამ თვალსაზრისით შეიცავდა არა ერთ სრულიად მიუღებელ და აღმაშფოთებელ განცხადებას. ამ მხრივ განსაკუთრებით აღსანიშნავია პასაჟი მისთვის არასასურველი არასამთავრობო ორგანიზაციების წარმომადგენელი სამი კონკრეტული პიროვნების მიმართ წარმოებული კვლევის და მათ მიმართ არსებული კითხვების შესახებ. სხვათა შორის, ივანიშვილმა მსგავსი მოკვლევის ჩატარების შესახებ ადრეც გვამცნო სამოქალაქო სექტორის სხვა წარმომადგენლების ( იმჯერად ე.ხოშტარიასა და სხვების) მიმართ, რომელთაც აგრეთვე თავიანთი გამონათქვამებით გამოუწვევიათ მისი გულისწყრომა ."შეკითხვების არსებობა "და "კვლევა "აშკარად სამართლებრივ დევნაზე ძალიან გამჭვირვალე მითითება და მუქარაა. აღსანიშნავია ისიც, რომ ხელისუფლებისადმი ამა-თუ იმ საკითხზე კრიტიკული დამოკიდებულების გამო, ეს არასამთავროები ივანიშვილის მუქარის საგნად იქცნენ, მაშინ, როდესაც მასში არამცთუ კვლევისა და გამოძიების მუზას არ აღვიძებს, მის უკმაყოფილებასაც კი არ იწვევს აშკარად პრორუსული, უფრო ზუსტად პუტინისტური ორგანიზაციების აშკარად ანტისახელმწიფოებრივი საქმიანობა ოკუპანტის სასარგებლოდ.

უფრო ოკუპანტის ინტერესების შეგნებული მსახურების და არა იმდენად პოლიტიკური უმეცრების ( თუმცა, შესაძლოა, ორივესი ერთად) გამოხატულებაა ივანიშვილის განცხადება იმის შესახებ, რომ ქართველები არ უნდა იბრძოდნენ უკრაინაში და ეს მოვლენა თურმე ნაციონალების მოწოდების შედეგია და საერთოდ უკრაინის მოვლენები კონკრეტულად მაინცდამაინც საქართველოს სულაც არ ეხება, არამედ ეხება მხოლოდ ზოგადად, როგორც მსოფლიოს ნაწილს და სულაც არა ამაზე მეტად! მაგალითად ისე, როგორც რუსების მიერ ოკეანიაში მოჩხრეკილ ვანუატუს, თითქოს საქართველოს ტერიტორიების დიდი ნაწილი იგივე აგრესორის მიერ არ იყოს ოკუპირებული, ხოლო დანარჩენი ტერიტორიები კი თავის რიგს არ უცდიდეს და ეს რიგი სწორედ ამ ომის მსვლელობაზე არ იყოს პირდაპირ დამოკიდებული! არა მგონია, ეს უმარტივესი ჭეშმარიტება ვინმეს გულწრფელად არ ესმოდეს, ან არ იცოდეს, როგორ წირავდნენ უკრაინელები თავს ჩვენი ტერიტორიული მთლიანობისთვის და რომ ეს ერთიანი ომია საერთო მტერთან და ის ქართველები, რომლებიც იქ თავს წირავენ, ამას მხოლოდ ზოგადსაკაცობრიო თანაგრძნობის გამო არ აკეთებენ ( თუმცა ესეც უაღრესად საპატივცემულო იქნებოდა და არა დასაგმობი!) და მით უფრო არ აკეთებენ ამას ნაციონალების მოწოდების გამო, არამედ უპირველეს ყოვლისა თავიანთივე ქვეყნისთვის.

რაც შეეხება კულუარულ მმართველობას, ეს ალასანიას მოჩვენება ყოფილა, საზოგადოების ივანიშვილის მიმართ არსებული ჭარბი ნდობით გამოწვეული. თუმცა ღარიბაშვილზე, რომელსაც, როგორც მან თავად განაცხადა "დაუტოვა თანამდებობა" ( ეს თანამდებობის დატოვება, ხომ თავისთავად დემოკრატიის და სამართლებრივი სახელმწიფოს თვალსაზრისით დიდად საინტერესო მოვლენაა!), ადრე ისიც წამოცდა, რომ მას, მარგველაშვილისგან განსხვავებით "ორჯერ გამეორება არ ჭირდება". ახალი ინტერვიუდან კი ვგებულობთ, რომ ზოგჯერ მთავრობას არამცთუ ორჯერ გამეორება, საერთოდ თქმაც არ ჭირდება, ისე იცნობს მილიარდერის აზრებსა და სურვილებს და ასრულებს მათ.

"საზოგადოების ჭარბი ნდობით აღჭურვილი მოქალაქისგან "ამავე საზოგადოებამ აგრეთვე შეიტყო, რომ ყველა პრობლემა ნაციონალების და მათი სიცრუის მანქანის - ტელეკომპანია "რუსთავი 2"_ის მოგონილია.

ლარის კურსის გაუფასურებაც კი მხოლოდ კარგია და სულაც არ აწვება ტვირთად ხალხს და თუ მაინცდამაინც დაზარალდნენ, მათივე ბრალია, რადგანაც ბირჟაზე ვალუტის კურსებით მოთამაშის უნარი არ აღმოაჩნდათ ან ბანკირი არ დაიქირავეს! ხოლო რათა საზოგადოება მომავალში სწორად გაერკვეს მოვლენებში და აღარ გაუჭირდეს მთავრობისთვის სასარგებლო ანალიზის გაკეთება, ივანიშვილი ტელეპროექტს ამზადებს და კიდევ ორასსერიან მხატვრულ ფილმსაც კი! ასე რომ, მოქალაქის ინტერვიუ ჩვეულებისამებრ და ჩვეულებრივზე მეტადაც კი, არ განიცდიდა ტრაგიკომიკური პასაჟების და შემეცნებით-გასართობი ხასიათის ნაკლებობას. შემეცნება და გართობა კი კარგია, მაგრამ ზემოთმოყვანილი დებულებებით მართული საზოგადოება და ქვეყანა რომ კარგ დღეში ვერ იქნება, ესეც აშკარაა“ - წერს თამარ ჩხეიძე.