ოპოზიცია Human Rights Watch-ის კრიტიკას იზიარებს

პოლიტიკა - 14:44, 30 Jan, 2015

1336

საერთაშორისო არასამთავრობო ორგანიზაცია Human Rights Watch-ის მხრიდან საქართველოსთან დაკავშირებით გამოთქმულ კრიტიკას ოპოზიცია იზიარებს, მაგრამ აღნიშნავს, რომ ეს ყველაფერი საერთაშორისო ურთიერთობებში ქვეყნის იმიჯზე ცუდად მოქმედებს.
„ნაციონალური მოძრაობის“ წევრის, სერგო რატიანის თქმით დღეს საქართველოს ხელისუფლების სავიზიტო ბარათი ოპონენტებზე ძალადობაა.

"მთავრობამ დაიმკვიდრა სახელი, როგორც მთავრობამ, რომელიც ახორციელებს პოლიტიკურ დევნას, შერჩევით სამართალს, ძალადობას ოპონენტების წინააღმდეგ, ძალადობას უმცირესობის მიმართ, ეს არის დღევანდელი მთავრობის სავიზიტო ბარათი“,-განაცხადა სერგო რატიანმა.

საერთაშორისო არასამთავრობო ორგანიზაცია Human Rights Watch-ის საქართველოს შესახებ გამოქვეყნებულ ანგარიშში ხელისუფლების მხრიდან ოპონენტებზე ზეწოლაზე არის საუბარი.
დოკუმენტში აღნიშნულია, რომ 2012 წლის ხელისუფლების ცვლის შემდეგ, პროკურატურაში ათასობით საჩივარი შევიდა, თუმცა, უწყებამ გამოძიება ძირითადად ყოფილი თანამდებობის პირების წინააღმდეგ დაიწყო. ტექსტში საუბარია ექსპრეზიდენტ მიხეილ სააკაშვილის, თბილისის ყოფილი მერის გიგი უგულავას, შს ყოფილ მინისტრ ვანო მერაბიშვილის, თავდაცვის სამინისტროს ყოფილი მაღალჩინოსნების და სხვა საქმეებზე. ტექსტში „ნაციონალური მოძრაობის“ წევრების ცემაც მოხვდა.