სოფლის მეურნეობის მინისტრი ოთარ დანელია საგარეო საქმეთა მინისტრის კომენტარს ეხმაურება, სადაც ბერუჩაშვილი რუსეთთან სავაჭრო ურთიერთობის შეწყვეტაზე საუბრობს.

დანელიას თქმით, საგარეო უწყების ხელმძღვანელს მსგავსი არაფერი უთქვამს და საქმე არასწორ ინტერპრეტაციასთან გვაქვს.

„მედიაში გავრცელებულ საგარეო საქმეთა მინისტრის განცხადებასთან დაკავშირებით, მინდა მოკლე კომენტარი გავაკეთო. ვფიქრობ, რომ საქმე გვაქვს არასწორ ინტერპრეტაციასთან.

მოგეხსენებათ, საქართველოს მთავრობას გამიჯნული გვაქვს რუსეთთან პოლიტიკური და სავაჭრო-ეკონომიკური ურთიერთობების საკითხები. ამის შესახებ ქვეყნის პრემიერ-მინისტრმა არაერთხელ განაცხადა.

შესაბამისად, სავაჭრო-ეკონომიკურ ნაწილში ურთიერთობები გრძელდება, რაც მნიშვნელოვანია ჩვენი მეწარმეებისთვის, ფერმერებისთვის, გლეხებისთვის.

ვფიქრობ, საგარეო საქმეთა მინისტრი დამატებით განმარტებებს თავად გააკეთებს“, - აცხადებს დანელია.

ამერიკაში ოფიციალური ვიზიტით მყოფმა საგარეო საქმეთა მინისტრმა თამარ ბერუჩაშვილმა რადიო „თავისუფლების“ კორესპონდენტთან საუბრისას განაცხადა, რომ ქართული მხარე რუსეთთან ვაჭრობის საკითხებზე დიალოგს დროებით აჩერებს. ბერუჩაშვილმა აღნიშნა, რომ საქართველოს ხელისუფლება რუსეთის ბაზარს „მახედ“ მიიჩნევს.

„რუსეთთან ვაჭრობის საკითხებზე დიალოგს დროებით ვაჩერებთ, რადგან მას აზრი არა აქვს. რუსეთს ნებისმიერ მომენტში შეუძლია, ემბარგო ისევ აამოქმედოს“, - აცხადებს ბერუჩაშვილი.