„36 ნაბიჯი ევროპული საქართველოსთვის"- ენმ-მ ქვეყნის კრიზისიდან გამოყვანის გეგმა შეიმუშავა

პოლიტიკა - 11:56, 30 Jan, 2015

1532

„ერთიანმა ნაციონალურმა მოძრაობამ“ ქვეყნის კრიზისიდან გამოყვანის გეგმა შეიმუშავა, დოკუმენტის სახელწოდებაა - „36 ნაბიჯი ევროპული საქართველოსთვის".

დოკუმენტის პრეამბულაში აღნიშნულია, რომ ხელისუფლებაში მოსვლის 2,5 წელიწადის თავზე ქვეყანაში პოლიტიკური, ეკონომიკური და ინსტიტუციონალური კრიზისია და ქვეყნა არაფორმალურად იმართება.
ენმ-ს აზრით მთავრობა თავს ვერ ართმევს ისეთი ამოცანების მოგვარებას, როგორიცაა - ეკონომიკის ზრდის ტემპის უზრუნველყოფა, ლარის კურსის სტაბილურობის შენარჩუნება, ინფრასტრუქტურის განვითარება, ინვესტიციების მოზიდვა. ბიუჯეტის შესრულება; კრიმინალთან ბრძოლა; გახშირებული ოჯახურ, ქალებისა და უმცირესობების მიმართ ძალადობის პრევენცია, ქვეყნის წინაშე მდგარ საგარეო გამოწვევებზე ადექვატური რეაგირება და სხვა.
ნაციონალურ მოძრაობაში განმარტავენ, რომ ახალი დოკუმენტი დაგროვილ გამოცდილებას, მიღწეულ დადებით შედეგებს, დაშვებული შეცდომებისა და დღევანდელი გამოწვევების ანალიზს ეფუძნება.

„ერთიანი ნაციონალური მოძრაობა“ მიიჩნევს, რომ უნდა მოხდეს იმ გადასახადების შემცირება, რომლებიც გათვალისწინებული იყო საგადასახადო კოდექსით 2012 წლის საპარლამენტო არჩევნებამდე: საშემოსავლო გადასახადი შემცირდეს 15%-მდე; გაუქმდეს დივიდენდზე გადასახადი; გაუქმდეს როიალთიზე გაასახადი; შემცირდეს დამატებითი ღირებულების გადასახადი 16%-მდე; გაუქმდეს ნავთობპროდუქტებზე აქციზის გადასახადი; შემცირდეს სააქციზო გადასახადები თამბაქოსა და ალკოჰოლზე; გადასახადების შემცირებასთან ერთად ამუშავდეს სხვადასხვა პროექტი, მათ შორის „შემოვლითი რკინიგზა“; ანაკლია-ლაზისკის პორტის მშენებლობა და სხვა.

ამასთან, პარტია მიიჩნევს, რომ საჭიროა გამოცხადდეს საგადასახადო ამნისტია 2015 წლის 1 იანვრამდე ჩადენილ ეკონომიკური და ფინანსური ხასიათის დანაშაულზე; მოხდეს ეკონომიკური და ფინანსური ხასიათის დანაშაულის მნიშვნელოვანი ნაწილის დეკრიმინალიზაცია, მათ შორის ასეთი ტიპის დანაშაულზე გამოირიცხოს წინასწარი პატიმრობის გამოყენება აღმკვეთი ღონისძიების სახით; აიკრძალოს საწარმოს არაგეგმიური შემოწმება სასამართლოს ნებართვის გარეშე; გადახდილ გადასახადზე 10%-ზე ნაკლები ცდომილების შემთხვევაში, ცდომილების გასწორება დაიშვას დასჯის და ადმინისტრაციული იძულების მექანიზმების გარეშე; შეწყდეს ბიუჯეტის დაფინანსების მიზნით ფართომასშტაბიანი შიდა ვალების აღების პრაქტიკა; შევიდეს ცვლილება ეკონომიკური თავისუფლების აქტში, რომლითაც დაწესდება ზედა ზღვარი შიდა ვალზე; მთავრობის მხრიდან ახალი (გარდა ევროკავშირთან ინტეგრაციისთვის აუცილებელი) რეგულაციების შემოღებაზე დაწესდეს მკაცრი ეკონომიკური ფილტრი. კერძოდ, შეიქმნას სპეციალური სტრუქტურა მთავრობის, პარლამენტის, ბიზნესის, არასამთავრობოების მონაწილეობით, რომელიც ყველა ახალ საკანონმდებლო ინიციატივას შეაფასებს ეკონომიკაზე ზეგავლენის მოხდენის კუთხით.

ამასთან, გეგმის მიხედვით, 2012 წლის შემდეგ შემოღებული სავიზო რეგულაციები უნდა გაუქმდეს; საქართველოს ეკონომიკაში და კერძოდ სოფლის მეურნეობის სექტორში, ინვესტიციების მოზიდვის მიზნით 2014 წლის შემდეგ დაწესებული შეზღუდვები უნდა გააუქმონ, მათ შორის მიწის კერძო საკუთრებაზე, ასევე, განახლდეს პრივატიზაციის პროცესი ეკონომიკაში ინვესტიციების მოზიდვის მიზნით და სხვა.

ასევე, „ნაციონალური მოძრაობა“ ევროკავშირთან უვიზო მიმოსვლის შეთანხმების გაფორმების პროცესსაც უსვამს ხაზს.

კრიზისიდან გამოსვლის დოკუმენტი მხოლოდ ეკონომიკურ სფეროს არ ეხება, ის ჯანდაცვის, დემოკრატიული ინსტიტების განვითარების და სხვა საკითხებსაც მოიცავს.