ევროპის საბჭოს საპარლამენტო ასამბლეის იურიდიული და ადამიანის უფლებათა დაცვის კომიტეტის სხდომა მიმდინარეობს, რომელსაც საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია ესწრება.

კომიტეტის სხდომაზე განსახილველად ადმინისტრაციული დაკავების პროცედურების საკითხია გამოტანილი.

დღესვე საპარლამენტო ასამბლეა ევროპის ქვეყნებში მედიის თავისუფლების საკითხებზე და იმ პრობლემებზე იმსჯელებს, რომელიც ჟურნალისტების საქმიანობის ხელის შეშლის და მათი სიცოცხლის ხელყოფის ფაქტებზე გამოძიების ჩატარებაზე უარის თქმის გამო არსებობს. აღსანიშნავია, რომ ამ საკითხის განხილვისას წარმოდგენილ ჩამონათვალში საქართველო არ ფიგურირებს.

„ჩვენი ქვეყნის მიმართ ამ კონტექსტში კრიტიკული შენიშვნები არ არსებობს, რაც უდაოდ პოზიტიური ფაქტია", - აღნიშნავს ბესელია.

დღესვე საპარლამენტო ასამბლეა ევროპის ქვეყნებში თანასწორობის და ტოლერანტობის პრინციპების დაცვაზე ანგარიშებს მოისმენს, ასევე გაკეთდება ანგარიში ეკონომიკური კრიზის ფონზე ბევრ ქვეყანაში არსებული პრობლემების შესახებაც, რომელიც ხანდაზმულებს, შეზღუდული შესაძლებლობის მქონე პირებსა და ბავშვებს შეეხო.

საპარლამენტო ასამბლეა მუშაობას 30 იანვარს დაასრულებს.