საპარლამენტო უმცირესობის ლიდერი დავით ბაქრაძე რუსეთისთვის სანქციების გაგრძელებასთან დაკავშირებით ევროსაბჭოს გადაწყვეტილებას ადეკვატურს და სწორს უწოდებს.

მისი თქმით, ეს გადაწყვეტილება რუსეთის ქმედებებზე ევროსაბჭოს მხრიდან გაგზავნილი სიგნალია.

„სწორი და ადეკვატური გადაწყვეტილება იყო. ერთხელ და სამუდამოდ რუსეთმა უნდა გაიგოს, რომ ყველაფერს აქვს თავისი ფასი. როდესაც შენ იპყრობ მეზობელ ქვეყანას, როდესაც ახდენ მეზობელი სახელმწიფოს და რეგიონების ანექსიას და ოკუპაციას, ამას აქვს თავისი ფასი. ეს იყო დღევანდელი სიგნალი და მოხარული ვარ, რომ კრიტიკულ მომენტში, კრიტიკულ სიტუაციაში ევროსაბჭომ შეძლო კიდევ ერთხელ დაემტკიცებინა, რომ ეს ორგანიზაცია ემსახურება მართლაც ღირებულებებს“ - განაცხადა დავით ბაქრაძემ.