პარტია „ქართული ოცნების“ აღმასრულებელი მდივანი ირაკლი კობახიძე ბიძინა ივანიშვილის მიერ ირაკლი ღარიბაშვილის ნათესავებთან დაკავშირებით გაკეთებულ განცხადებას გამოეხმაურა და განაცხადა, რომ ღარიბაშვილის ნათესავებთან დაკავშირებით პრობლემები არსებობდა, მაგრამ ის უკვე აღმოფხვრილია.

"თვალნათლივ გამოჩნდა, რომ ამ კუთხით პრობლემები არსებობდა. ეს პრობლემები ამ ეტაპზე აღმოფხვრილი და მოგვარებულია", - განაცხადა კობახიძემ.

კობახიძემ ბიძინა ივანიშვილის პოლიტიკაში შესაძლო დაბრუნებაზეც გააკეთა განცხადება და აღნიშნა, რომ მიმდინარე პროცესებიდან გამომდინარე, ამის საჭიროება არ დგას.

"ძალიან ბევრი გარემოებებია დამოკიდებული ბიძინა ივანიშვილის პოლიტიკაში დაბრუნებაზე. დაველოდოთ მოვლენების განვითარებას. შესაძლოა ამის საჭიროება დადგეს, თუმცა ამ ეტაპზე მოვლენები სხვაგვარად მიმდინარეობს", - აღნიშნა კობახიძემ.

შეგახსენებთ, ყოფილმა პრემიერ მინისტრმა ბიძინა ივანიშვილმა ტელეკომპანია "იმედთან" ინტერვიუში ირაკლი ღარიბაშილის ნათესავებზე ისაუბრა და განაცხადა, რომ მას პრემიერისტვის არაერტხელ უთქვამს, რომ მისი პრობლემა ნათესავები და დაცვა იქნებოდა.