28 იანვარს ავტორიტეტულმა საერთაშორისო ორგანიზაცია „ფრიდომ ჰაუსმა“ გამოაქვეყნა ყოველწლიური ანგარიში იმის თობაზე, თუ რა ვითარებაა თავისუფლების თვალსაზრისით მსოფლიოში. 195 ქვეყანას შორის საქართველო, გასული წლის მსგავსად, „ნაწილობრივ თავისუფალი“ქვეყნების ჩამონათვალში მოხვდა: მას 7-ქულიან სისტემაში როგორც პოლიტიკური უფლებების, ისე სამოქალაქო თავისუფლებების შეფასებისას 3 ქულა მიენიჭა. „ფრიდომ ჰაუსის“ ანგარიშში, როგორც სადავო ტერიტორიები, მოხვდა აფხაზეთი და ე.წ. სამხრეთ ოსეთი, სადაც მდგომარეობა „ნაწილობრივ თავისუფლად“ და „არათავისუფლად“ არის შეფასებული.

„უარყოფილი დემოკრატია - მიბრუნება რკინის მუშტთან“ - ასე უწოდა საერთაშორისო ორგანიზაცია „ფრიდომ ჰაუსმა“ თავის ახალ ყოველწლიურ ანგარიშს „თავისუფლება მსოფლიოში - 2015“, რომელიც ქვეყნებში პოლიტიკური უფლებებისა და სამოქალაქო თავისუფლებების კუთხით არსებულ ვითარებას სწავლობს. წლევანდელ ანგარიშში ნათქვამია, რომ 2014 წელს ავტორიტარული რეჟიმების აგრესიულმა ტაქტიკამ, ტერორისტული აქტების გახშირებამ, რუსეთის შეჭრამ უკრაინაში და სხვა მსგავსმა მოვლენებმა ხელი შეუწყო მსოფლიოში თავისუფლების მხრივ არსებული მდგომარეობის გაუარესებას.

„დემოკრატიის აღიარება მსოფლიოში მმართველობის დომინანტურ ფორმად და დემოკრატიულ იდეებზე დაფუძნებულ საერთაშორისო სისტემად უფრო მეტი საფრთხის ქვეშ არის, ვიდრე ოდესმე ყოფილა ბოლო 25 წლის განმავლობაში“, - განაცხადა „ფრიდომ ჰაუსის“ გამოკვლევების საკითხებში ვიცე-პრეზიდენტმა არჩ პადინგტონმა.

შეფასებული 195 ქვეყნიდან 89 ქვეყანა (46 %) მიჩნეულია თავისუფლად. 55 ქვეყანა, ანუ 28 %, რომელშიც ასევე შედის საქართველო, „ნაწილობრივ თავისუფალია“, 51 ქვეყანა კი (26%), „ფრიდომ ჰაუსის“ შეფასებით, -„არათავისუფალი“.

„ფრიდომ ჰაუსი“ მსოფლიოს ქვეყნებში არსებულ ვითარებას 25 სხვადასხვა კრიტერიუმის მიხედვით აფასებს. ორგანიზაციის შეფასების სისტემის თანახმად,ყველაზე თავისუფლად ითვლება ქვეყანა, რომელიც 1 ქულით ფასდება, ყველაზე არათავისუფალი ქვეყნის შეფასების მაჩვენებელი კი7 ქულაა.

საქართველოს წელსაც, გასული წლის მსგავსად, „ნაწილობრივ თავისუფალის“ სტატუსი აქვს და 7 ქულიდან 3 ქულა აქვს მინიჭებული, როგორც პოლიტიკური უფლებების, ისე სამოქალაქო თავისუფლებების თვალსაზრისით.