ჯეიმს აპატურაი NATO-ში ლევან დოლიძის საქმიანობას დადებითად აფასებს

პოლიტიკა - 11:18, 28 Jan, 2015

1339

ნატო-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში ჯეიმს აპატურაი, ნატო-ში საქართველოს მუდმივი წარმომადგენლის პოსტზე ლევან დოლიძის საქმიანობას დადებითად აფასებს.

ჯეიმს აპატურაიმ ლევან დოლიძესთან გამოსამშვიდობებელი სადილი გამართა, რომლის შესახებაც ინფორმაციას სოციალურ ქსელ „ფეიქბუქის“ საკუთარ გვერდზე აქვეყნებს. ინფორმაციას შეხვედრის ფოტოც ახლავს თან.

„ლევან დოლიძესთან და მის მომხიბვლელ მეუღლე ქეთევანთან გამოსამშვიდობებელი სადილი გავმართე. იგი შეიძლება განათლებით დიპლომატი არ არის, მაგრამ მან საქართველოსთვის დიდი სამუშაო გასწია. ასევე, მქონდა პატივი ევროკავშირში საქართველოს ელჩს შევხვედროდი, რომელმაც აშკარად ბევრი რამ გააკეთა საქართველოს ევროპული მომავლის უზრუნველსაყოფად“, - წერს ჯეიმს აპატურაი.

ნატო-ში საქართველოს მუდმივმა წარმომადგენელმა ლევან დოლიძემ პოსტი 26 იანვარს დატოვა. დოლიძემ თანამდებობის დატოვების შესახებ გადაწყვეტილება მას შემდეგ მიიღო, რაც კოალიცია „ქართული ოცნება“ პარტია „თავისუფალმა დემოკრატებმა“ დატოვეს. ლევან დოლიძე „თავისუფალი დემოკრატების“ ერთ-ერთი ლიდერის ვიქტორ დოლიძის ძმაა.

ამასთან, როგორც საგარეო უწყებაში განმარტავენ, ნატო-ში საქართველოს მუდმივი წარმომადგენლის კანდიდატურა უახლოეს მომავალში დასახელდება.