დავით ნარმანია მიწისქვეშა გადასასვლელების დასუფთავების სამუშაოებს დაესწრო

პოლიტიკა - 17:54, 27 Jan, 2015

1408

თბილისის მერი დავით ნარმანია მელიქიშვილის გამზირზე, თბილისის საკონცერტო დარბაზის წინ მდებარე მიწისქვეშა გადასასვლელის დასუფთავების სამუშაოებს გაეცნო.

მიწისქვეშა გადასასვლელებს შპს „უძრავი ქონება - თბილისი“ და შპს „თბილსერვის ჯგუფი“ გასული კვირიდან, ერთობლივი ძალებით ასუფთავებენ.

დავით ნარმანიას განცხადებით, დედაქალაქში არსებული ყველა მიწისქვეშა გადასასვლელი ეტაპობრივად მოწესრიგდება და სპეციალური ხსნარით გაირეცხება. თბილისის მერი მოქალაქეებს შეახსენებს, რომ გარემოს დაბინძურება ადმინისტრაციული წესით დასჯადი ქმედებაა და პირველ შემთხვევაში 50, განმეორების შემთხვევაში კი 150 ლარიან ჯარიმას ითვალისწინებს.

იგი მოუწოდებს მოსახლეობას, თავი შეიკავონ მიწისქვეშა გადასასვლელების დაბინძურებისა და კედლებზე განცხადების განთავსებისგან. დავით ნარმანიას თქმით, განცხადებებისთვის სპეციალური ადგილები გამოიყოფა.

დედაქალაქში არსებული 51 მიწისქვეშა გადასასვლელი შპს „უძრავი ქონება - თბილისის“ დაქვემდებარებაში თბილისის მთავრობის 21 იანვრის გადაწყვეტილებით გადავიდა. მთავრობის სხდომაზე კომპანიას მიწისქვეშა გადასასვლელების დასუფთავებისთვის თბილისის მერმა 10 დღის ვადა მისცა. გარდა ამისა, არსებული რესურსებით მიწისქვეშა გადასასვლელების მოსაწესრიგებლად და განათების უზრუნველსაყოფად კომპანიას გეგმა გრაფიკის შემუშავება დაევალა.

თბილისის 2015 წლის ბიუჯეტში მიწისქვეშა გადასასვლელების მოსაწესრიგებლად მილიონ ლარზე მეტია გათვალისწინებული. რამდენიმე მიწისქვეშა გადასასვლელში დაიწყო კეთილმოწყობის სამუშაოები, შეზღუდული შესაძლებლობის პირებისთვის დამონტაჟდა ლიფტები.

მიწისქვეშა გადასასვლელების მოვლა პატრონობა სამ სხვადასხვა უწყებაზე იყო გადანაწილებული და პასუხისმგებლობები მკაფიოდ არ იყო განსაზღვრული.