ბუტა რობაქიძის დედა ია მეტრეველი ომბუდსმენის მიერ გავრცელებულ ინფორმაციას ეხმაურება, სადაც ნათქვამია, რომ ირაკლი ფირცხალავა და ყოფილი პოლიციელები მის მოკვლას ერთ-ერთ პატიმარს ავალებდნენ.

როგორც „ნიუპოსტთან“ საუბარში მეტრეველმა განაცხადა, სახალხო დამცველის მიერ დასახელებული პატიმარი მასაც უკავშირდებოდა და მოსალოდნელი საფრთხის შესახებ ატყობინებდა.

„ერთი წელია ამის შესახებ ინფორმაცია მქონდა. პროკურატურაშიც ვთქვი ამის შესახებ და ომბუდსმენსაც ვუთხარი. კარგია ახლა რომ დაინტერესდნენ ამ საკითხით. ერთი წლის წინ დამირეკა ციხიდან პატიმარმა და მითხრა ეს ინფორმაცია. მე თავიდან ყურადღება არ მივაქციე. ეს ბიჭი არ ჩერდებოდა, რადიოში ჩაერთო, შემდეგ - „ობიექტივში“ და იქ თქვა ამის შესახებ, შემდეგ კიდევ დამირეკა და ისეთ დეტალებზე საუბრობდა, რომ უკვე დამაჯერებელი იყო ყველაფერი. დეტალებს ჰყვებოდა, ასახელებდა მანქანის ნომრებს, ადგილს სადაც წაიყვანეს და ეს გეგმა გააცნეს. ეს ბიჭი ამბობდა, რომ მე მაგას როგორ ვიზამდიო, მაგრამ სხვას გააკეთებინებდნენ, მკვლელის მოძებნა მათთვს პრობლემა არ იყო. გადამარჩინა იმან, რომ 2008 წლის ომი დაემთხვა და ჩემთვის აღარ ეცალათ. თურმე უთქვამთ კიდეც ამ პატიმრისთვის, რომ ძალაში რჩება ჩვენი შეთანხმებაო, თუმცა ეხლა მაგისთვის არ გვცალიაო. ეხლა ეს პატიმარი ქუთაისშია ერთ-ერთი სასჯელაღსრულების დაწესებულებაში“, - განუცხადა „ნიუპოსტს“ მეტრეველმა.

ომბუდსმენის ინფორმაციით, 2008 წელს ერთ-ერთ მსჯავრდებულს თბილისის კრიმინალური პოლიციის ყოფილმა უფროსმა ირაკლი ფირცხალავამ ბუტა რობაქიძის დედის, ია მეტრეველის მოკვლა დაავაალა.