თავად საშველი სამაშველო, გაუმართავი სახანძრო და ხანძრის გამო ღია ცის ქვეშ დარჩენილი ოჯახი

პოლიტიკა - 13:57, 27 Jan, 2015

1462

ჩოხატაურში სოფელ გუთურში ჩხიკვიშვილების საცხოვრებელი სახლი მთლიანად დაიწვა. მომხდარის მიზეზად სახანძრო დახმარების მანქანის გაუმართაობა სახელდება.
როგორც "ნიუპოსტთან" თვითმხილველებმა განაცხადეს, ცეცხლის ლოკალიზებას მხოლოდ ერთი სახანძრო მანქანა ცდილობდა, რომელიც საკმაოდ ძველი იყო. აღსანიშნავია, რომ ამ ტიპის სახანძრო მანქანის ავზი მცირე რაოდენობით წყალს იტევს, რის გამოც მას წყლის მოსატანად გარკვეული მანძილის გავლა უწევდა.
ადგილობრივების განცხადებით, მოგვიანებით ცეცხლის ჩაქრობაში ოზურგეთიდან გამოძახებული სახანძრო მანქანებიც ჩაერთვნენ, რომლებიც შეტყობინების მიღებიდან შემთხვევის ადგილზე დაახლოებით ნახევარ საათში მივიდნენ. ამ დროს სახლის დიდი ნაწილი უკვე დამწვარი იყო, შესაბამისად, მეხანძრეებმა სახლის გადარჩენა ვერ მოახერხეს.
წინასწარი ინფორმაციით, სახლს ხანძარი სავარაუდოთ ელექტროგაყვანილობის გამო გაუჩნდა."ეს პირველი შემთხვევა არ არის, როდესაც სახლი სახანძროს გაუმართავი ტექნიკის გამო დაიწვა. მოვითხოვთ ზარალის ანაზღაურებას. მუნიციპალიტეტის იმდენი სახანძრო მანქანა არ ჰყავს, რომ ხანძრის ლოკალიზება მოახდინოს. სანამ სახანძრო მანქანა ოზურგეთიდან ჩამოვა, მანამდე სახლისგან არაფერი რჩება. მინდა გითხრათ, რომ სარჩელი შემაქვს სასამართლოში.” – აცხადებს დაზარალებული მამუკა მგალობლიშვილი.
სამაშველო და სახანძრო სამსახურში აცხადებენ, რომ სახანძრო ბრიგადა შემთხვევის ადგილზე გამოძახებიდან 3 წუთში მივიდა. "გამოხებიდან 3 წუთში ჩვენი ბრიგადა იქ იყო, მაგრამ, იმდენად ძლიერი იყო ცეცხლის კერა, სახლი მთლიანად დაიწვა. ხანძრის ლოკალიზება დროულად მოხდა.” – აცხადებენ სამაშველო და სახანძრო სამსახურის პრესცენტრში.
"ძველი მანქანებია. პარკი მთლიანად შესაცვლელია, ეს მანქანები შეკეთებას აღარ ექვემდებარება. სამი მანქანა გყავს და სამივე უვარგისია",- განაცხადა ერთ-ერთმა მეხანძრემ.

როგორც ჩოხატაურის მუნიციპალიტეტის გამგეობაში აცხადებენ, ხანძრის შედეგადად დაზარალებულების მდგომარეობას, სპეციალური კომისია შეისწავლის. თუმცა რა სახის და რა ოდენობის თანხით დაეხმარება ადგილობრივი ხელისუფლება დაზარალებულ ოჯახს ამ დროისთვის უცნობია.

თეა იოსელიანი - გურია