„თავისუფალი დემოკრატების“ აზრით, გაუგებარია რატომ არიდებს კითხვებზე პასუხების თავს გამოძიება, როდესაც საქმე ამდენად გახმაურებულ დანაშაულს ეხება.

„ეს არის ძალიან გახმაურებული ტრაგიკული თემა და ეს მარტო ერთ ოჯახს არ ეხება, ეს მთლიანად ქვეყანას და შიდა უსაფრთხოების საკითხებს ეხება და მაშინ როდესაც პარლამენტი თხოვს საგამოძიებო ორგანოებს მობრძანებას და ახსნას, ვფიქრობ, პროკურატურა ვალდებულია მოვიდეს,“ - განაცხადა „თავისუფალი დემოკრატების“ წევრმა, ვიქტორ დოლიძემ.

„ნაციონალური მოძრაობის“ წევრმა სერგო რატიანმა დღეს გამართულ პრეს-კონფერენციაზე კატეგორიულად მოითხოვა მკაცრი საპარლამენტო კონტროლი ისეთ გახმაურებულ საქმეებზე, როგორიცაა ვაზაგაშვილის მკვლელობა.

„სამართალდამცავები მზად არ არიან კითხვებზე პასუხების გასაცემად. ხშირ შემთხვევაში, კეთდება პოლიტიკური განცხადებები, რომ ისინი მოვლენ პარლამენტში და იქნება განხილვა, მაგრამ შემდეგ ასე არ ხდება ხოლმე,“ - განაცხადა სერგო რატიანმა.