საპარლამენტო უმრავლესობის ლიდერი, დავით საგანელიძე მიიჩნევს, რომ ვახტანგ გომელაური შინაგან საქმეთა მინისტრის პოსტზე ერთ-ერთი საუკეთესო მინისტრი იქნება.

როგორც საგანელიძემ ჟურნალისტებს განუცხადა, ის დიდი ხანია გომელაურს იცნობს როგორც პატიოსან და წესიერ ადამიანას.

„ის არის საუკეთესო კანდიდატურა, რომელიც შეიძლებოდა ყოფილიყო, ამას ხაზგასმით ვამბობ, თავისი განათლებით, ღირსებით, წესიერებით, პატიოსნებით, რეფორმატორული სულით და საქმისადმი ერთგულებით. ამ საქმეს ერთგულება და მუნდირის პატივისცემა სჭირდება. ღირსეული უნდა იყო. ჩემთვის ასეთია გომელაური. მიმაჩნია, რომ ის ერთ-ერთი საუკეთესო მინისტრი იქნება, ვინც ამ თანამდებობაზე გვინახავს,“ - განაცხადა საგანელიძემ.

საპარალამენტო უმრავლესობის ლიდერმა ოპოზიციის იმ კრიტიკასაც უპასუხა, რომლის თანახმად, გომელაური იმიტომ დაინიშნა აღნიშნულ თანამდებობაზე, რომ ყოფილი პრემიერის, ბიძინა ივანიშვილის დაცვას ხელმძღვანელობდა.

„სხვა ვერაფერი მოუძებნეს. მემგონი ყველაზე კარგი რამ მოძებნეს, რადგან ივანიშვილთან სამსახური ხაზს უსვამს იმას, რომ მას გამოცდილებაც მეტი ექნება, ღირსეული მუშაობაც ეცოდინება და წესიერიც იქნება. წინააღმდეგ შემთხვევაში, თავის სამსახურში სხვანაირად არ აიყვანდა,“ - განაცხადა საგანელიძემ.

ამ დრომდე გომელაური შინაგან საქმეთა მინისტრის პირველი მოადგილე იყო. ხოლო ჭიკაიძის გადადგომის შემდეგ ის მინისტრის მოვალეობას ასრულებდა. გომელაური მინისტრად პრემიერმა მთავრობის ადმინისტრაციაში წარადგინა.