ირანის ისლამურ რესპუბლიკაში ოფიციალური ვიზიტით მყოფი საქართველოს პარლამენტის თავმჯდომარე, დავით უსუფაშვილი თეირანის უნივერსიტეტის სამართლისა და პოლიტიკურ მეცნიერებათა ფაკულტეტზე სიტყვით გამოვიდა.

პარლამენტის თავმჯდომარე აუდიტორიას საქართველოს უახლეს ისტორიაზე, რეგიონულ კონტექსტზე და თანამედროვე, გლობალურ პოლიტიკაზე ესაუბრა.

დავით უსუფაშვილის საჯარო ლექციას უნივერსიტეტის პროფესორ-მასწავლებლებსა და სტუდენტებთან ერთად, ირანის ისლამური რესპუბლიკის განათლების მინისტრი, საგარეო საქმეთა მინისტრის მოადგილე და სხვა მაღალი რანგის თანამდებობის პირები დაესწრნენ.

ვიზიტის ფარგლებში, საქართველოს პარლამენტის თავმჯდომარე, დავით უსუფაშვილი, ირანის მიზანშეწონილობის საბჭოს თავმჯდომარეს, ალიაქბარ ჰაშემ რავსანჯანის შეხვდა.

შეხვედრისას ხაზი გაესვა ორ ქვეყანას შორის არსებულ ისტორიულ-კულტურულ კავშირებს. ალიაქბარ ჰაშემ რავსანჯანიმ, თავის სიტყვაში, ყურადღება გაამახვილა ქართველთა კვალზე ირანის ისტორიაში, მის ვიზიტზე საქართველოში და თანამშრომლობის გაღრმავებაზე ისეთ მნიშვნელოვან სფეროებში, როგორიცაა ვაჭრობა, ენერგეტიკა, ტურიზმი და საერთაშრისო გადაზიდვები.

მიზანშეწონილობის საბჭოს თავმჯდომარის განცხადებით, ირანელი ბიზნესმენები საქართველოთი დაინტერესებულნი არიან და რეგიონში მიმდინარე ეკონომიკური პროექტების მიმართ ინტერესს გამოხატავენ.

საქართველოს პარლამენტის თავმჯდომარემ მასპინძელ მხარეს თბილი მიღებისთვის მადლობა გადაუხადა და იმედი გამოთქვა, რომ გლობალური შემაფერხებელი ფაქტორები მალე აღმოიფხვრება და ქვეყნები უფრო აქტიურ და სრულფასოვან ეკონომიკურ თანამშრომლობას შეძლებენ.

დავით უსუფაშვილმა ევროკავშრთან ასოცირებაზე და იმ ეკონომიკურ პერსპექტივებზეც ისაუბრა, რასაც ევროკავშირთან ვაჭრობის შეახებ შეთანხმება იძლევა არამხოლოდ სქართველოსთვის, არამედ მთლიანად რეგიონისთვის.

რეგიონულ უსაფრთხოებაზე, საუბრისას, განხილული იქნა რუსეთ-აფხაზეთს შორის გაფორმებულ „მეკავშირეობისა და სტრატეგიული პარტნიორობის შესახებ ხელშეკრულებაც“, ქართულმა მხარემ მადლობა გადაუხადა მასპინძლებს, ირანის ისლამური რესპუბლიკის პრინციპული პოზიციის გამო საქართველოს სუვერენიტეტსა და ტერიტორიულ მთლიანობასთან მიმართებაში. დავით უსუფაშვილის თქმით, საქართველოს და ირანის ისლამურ რესპუბლკას შორის არსებული ურთიერთობა არის ნათელი მაგალითი იმისა, თუ როგორი მეგობრული და კეთილმეზობლური ურთიერთობა შეიძლება გააჩნდეთ სახელმწიფოებს მიუხედავად მათი პოლიტიკური, რელიგიური, თუ კულტურული განსხვავებებისა.