„ნაციონალური მოძრაობის“ ინფორმაციით, რუსული ავიაკომპანიების საქართველოში კაბალური პირობებით შემოყვანასთან დაკავშირებით, 25 იანვარს რუსეთსა და საქართველოს წარმომადგენლებს შორის მოლაპარაკებები გაიმართება.

უმცირესობის ინფორმაციით, ამ მოლაპარაკებებისთვის რუსეთიდან სპეციალური ჯგუფი ჩამოდის.

„ჩვენ შევიტყვეთ რომ ზეგ, 25 იანვარს, საზოგადოების ზურგს უკან, გაიმართება მორიგი მოლაპარაკებები საქართველოსა და რუსეთს შორის რუსული ავიაკომპანიების საქართველოში კაბალური პირობებითა და ჩვენი ქვეყნის ინტერესების საწინააღმდეგოდ შემოყვანასთან დაკავშირებით. საქართველოს მხრიდან ამ მოლაპარაკებებს აწარმოებს ივანიშვილის პირადი ბორტ-ინჟინერი, რომელიც მან დანიშნა ავიაციის დეპარტამენტის უფროსად.

ამ მოლაპარაკებებისთვის რუსეთიდან ჩამოდის სპეციალური ჯგუფი. გვინდა ცალსახად განვაცხადოთ, რომ ჩვენ არ ვართ წინააღმდეგი ზოგადად ქართული საჰაერო სივრცის გახსნის და ამ სექტორში თავისუფალი საბაზრო მიდგომების გამოყენების. მაგრამ ჩვენ ვთვლით, რომ აქ არ უნდა შემოდიოდენ ავიაკომპანიები რომლებიც არღვევენ საქართველოს კანონს ოკუპირებული ტერიტორიების შესახებ (მაგალითად აეროფლოტი, პერიოდულად ახორციელებს რეისებს სოხუმში), ავიაკომპანიები, რომლებიც არიან პირადად პუტინის მფლობელობაში (მაგალიტად უტეაირი (UTAIR) და ავიაკომპანიები, რომლეთაც აქვთ ძალიან დიდი მოცულობის ვალები დასავლური სანქციების გამო და აქ შეიძლება შემოდიოდნენ მხოლოდ პოლიტიკური და არა ბიზნეს მოტივებით (მაგალითად ტრანსაერო). ჩვენ ასევე ვეწინააღმდეგებით მოლაპარაკებების საზოგადოების ზურგს უკან ფარულად წარმოებას“, - ნათქვამია „ნაციონალური მოძრაობის“ მიერ გავრცელებულ ინფორმაციაში.