პარლამენტში პრეზიდენტის გამოსვლის თარიღი რამდენიმე დღეში გახდება ცნობილი, - ამის შესახებ ჟურნალისტებს პრეზიდენტის საპარლამენტო მდივანმა გიორგი კვერენჩხილაძემ განუცხადა.

მისივე განმარტებით, თარიღი პარლამენტის აპარატთან შეთანხმდება. ამ საკითხთან დაკავშირებით პრეზიდენტის ადმინისტრაციაში მუშაობა მიმდინარეობს.

"უახლოეს დღეებში გახდება ცნობილი პრეზიდენტის პარლამენტში მისვლის სავარაუდო თარიღი, რაც, რა თქმა უნდა, პარლამენტის ხელმძღვანელობასთან ერთობლივად იქნება ჩამოყალიბებული. რაც შეეხება გამოსვლის თარიღის გადავადებას, ეს გათვალისწინებულია პარლამენტის რეგლამენტის მიხედვით. თუ გადავავლებთ თვალს უკანასკნელი პერიოდების მოხსენებებს, ყოველთვის ცოტა მოგვიანებით ხდება ხოლმე პრეზიდენტის გამოსვლა პარლამენტში", - აღნიშნა პრეზიდენტის საპარლამენტო მდივანმა.

მოხსენების შემდეგ დებატების გამართვის საკითხს, კვერენჩილაძის თქმით, ქვეყნის პირველი პირი ნებისმიერ ფორმატში მონაწილეობისთვის მზადაა.

"დებატების საკითხი არის პარლამენტის გადასაწყვეტი. მე შემიძლია დაგიდასტუროთ საქართველოს პრეზიდენტის მზადყოფნა ნებისმიერ ფორმატში, მათ შორის პოლიტიკურ დებატებში მიიღოს მონაწილეობა", - განაცხადა გიორგი კვერენჩხილაძემ.