მოვუწოდებ სამართალდამცავებს, მაქსიმალურად სწრაფად გამოიძიონ ეს სასტიკი მკვლელობა

მოვუწოდებ სამართალდამცავებს, მაქსიმალურად სწრაფად გამოიძიონ ეს სასტიკი მკვლელობა - პრემიერი

პოლიტიკა - 18:45, 22 Jan, 2015

1468

საქართველოს პრემიერ-მინისტრი ირაკლი ღარიბაშვილი იური ვაზაგაშვილის გარდაცვალების გამო მის ოჯახსა და ახლობლებს კიდევ ერთხელ უსამძიმრებს, - კომენტარი მომხდარზე პრემიერმა დავოსში გააკეთა, სადაც მსოფლიო ეკონომიკურ ფორუმში მონაწილეობს.

ირაკლი ღარიბაშვილის განცხადებით, მთელი მისი ყურადღება მიმართულია საქართველოში განვითარებულ მოვლენებზე.

„რა თქმა უნდა, ძალიან მძიმე იყო იმ ამბის მოსმენა, რომელიც ჩვენ ყველამ ერთად შევიტყვეთ. ეს არის მართლაც შემზარავი, შოკისმომგვრელი ფაქტი თითოეული ჩვენგანისთვის და პირადად ჩემთვის, ვინაიდან მე ძალიან ახლოს ვიცნობდი ბატონ იურის. არ მინდა მოვლენებს დავასწრო, მაგრამ მიუხედავად იმისა, რომ საკმაოდ გაიწელა მისი შვილის მკვლელობის გამოძიება, პრაქტიკულად ბოლომდე არის მიყვანილი გამოძიება“, - განაცხადა პრემიერმა.

ირაკლი ღარიბაშვილმა სამართალდამცავებს მომხდარის სწრაფად გამოძიებისკენ კიდევ ერთხელ მოუწოდა და აღნიშნა, რომ ამ მიზნით მობილიზებულია პროკურატურა და შინაგან საქმეთა სამინისტრო.

„მოვუწოდებ სამართალდამცავებს, მაქსიმალურად სწრაფად გამოიძიონ აღნიშნული სასტიკი მკვლელობა და რაც მთავარია, სწრაფად დაასრულონ ზურა ვაზაგაშვილის მკვლელობის საქმე“, - აღნიშნა ირაკლი ღარიბაშვილმა.