თბილისის საერთაშორისო აეროპორტში ინციდენტი მოხდა. თამაზ სუხიაშვილის პატივის მისაგებად მისული „ნაციონალური მოძრაობის“ წევრები დაცვამ აეროპორტში არ შეუშვა. დაცვის თანამშრომლები განმარტავდნენ, რომ ისინი საგარეო უწყებიდან მიღებული სიებით ხელმძღვანელობდნენ, თუ ვინ შეეშვათ აეროპორტში და ვინ - არა.

"ნაციონალური მოძრაობის" წევრები ფიქრობენ, რომ მათ აეროპორტში შესვლის საშუალება შეგნებულად არ მისცეს და მომხდარს პოლიტიკურად მოტივირებული უწოდეს.

"სიტუაციაში, როდესაც ალბათ ყველა უნდა ფიქრობდეს მხოლოდ თანადგომაზე და პატივის მიგებაზე, სამსახურები, რომლებსაც აქ არანაირი წესრიგის დამყარება არ ევალებათ, საკუთარ თავზე იღებენ თუ ვინ უნდა შეუშვან და ვინ - არა. აშკარაა, რომ პოლიტიკური ნიშნით მოხდა ეს ყველაფერი“, - განაცხადა გივი თარგამაძემ.