გერმანია-საქართველოს შორის ორმხრივი ურთიერთობა და შემდგომი თანამშრომლობა იყო მთავარი თემა საქართველოს პარლამენტის თავმჯდომარე დავით უსუფაშვილისა და გერმანიის ბუნდესტაგის წევრ კრისტოფ ბერგნერის შეხვედრისას, რომელიც დღეს, პარლამენტის თბილისის სასახლეში გაიმართა.

შეხვედრაზე მხარეებმა ისაუბრეს საქართველოში გერმანიის ბუნდესტაგის სპიკერის მოახლოებულ ვიზიტზე, რომელიც პარლამენტის თავმჯდომარის განცხადებით, ჩვენი ქვეყნისთვის მნიშვნელოვანი მოვლენაა.
საუბარი შეეხო ასევე გერმანიის მხრიდან ასოცირების ხელშეკრულების რატიფიცირების საკითხს, რომელიც უახლოეს მომავალში იგეგმება.
სტუმარი თავის მხრივ, დაინტერესდა, საქართველოში განვითარებული შიდა პოლიტიკური მდგომარეობით და აქ განვითარებული პროცესებით, რის შესახებაც პარლამენტის თავმჯდომარისგან შესაბამისი ინფორმაცია მიიღო.
როგორც კრისტოფ ბერგნერმა აღნიშნა, იგი საქართველოს ამ თორმეტიოდე წლის წინათ სტუმრობდა და მისი შეფასებით, მართლაც შთამბეჭდავია ის პროგრესი, რასაც საქართველომ ამ წლების განმავლობაში მიაღწია.
დავით უსუფაშვილმა კიდევ ერთხელ დაადასტურა საქართველოს ურყევი სწრაფვა ევროატლანტიკური სტრუქტურებისკენ და ხაზგასმით აღნიშნა გერმანიის დიდი როლი ამ პროცესებში.
შეხვედრის დასასრულს, პარლამენტის თავმჯდომარემ დაადასტურა საქართველოს მზადყოფნა გერმანიასთან და, ზოგადად, დემოკრატიულ სამყაროსთან თანამშრომლობისათვის ყველა მიმართულებით. გერმანიის ბუნდესტაგის წევრმა კი აღნიშნა, რომ გერმანია კვლავაც მხარს უჭერს საქართველოს სუვერენიტეტს და ჩვენი ქვეყნის დემოკრატიული განვითარებისკენ სწრაფვას.