რუსეთის ქმედებები მოლაპარაკებების შესაძლებლობას ზღუდავს- ევროკომისარი

პოლიტიკა - 12:11, 19 Jan, 2015

1235

ევროკავშირის კომისარი გაფართოებისა და ევროპული სამეზობლო პოლიტიკის საკითხებში, იოჰანეს ჰანი გაზეთ „კვირის პალიტრასთან“ საუბარში უკრაინაში და საქართველოში მიმდინარე პროცესებში რუსეთის ფაქტორზე საუბრობს და აცხადებს, რომ უკრაინაში და საქართველოს ოკუპირებულ ტერიტორიებზე რუსეთის ქმედებები მოლაპარაკებების, დისკუსიების შესაძლებლობას ზღუდავს.

„ჩვენ ყველაფერს ვხედავთ და შეშფოთებულიც ვართ მოვლენათა არასასურველი განვითარებით აფხაზეთსა და ე. წ. სამხრეთ ოსეთის რეგიონებში. შეშფოთებული ვართ იმით, რასაც რუსეთი აკეთებს უკანასკნელი რამდენიმე თვის განმავლობაში, წლებზე რომ არაფერი ვთქვათ. რა თქმა უნდა, ეს ზღუდავს მოლაპარაკებების, დისკუსიების შესაძლებლობას. არადა, ჩვენ ყოველთვის ვამბობდით, რომ მზად ვართ, ვისაუბროთ, განვიხილოთ საქართველოს კონფლიქტების მოგვარების შესაძლებლობები, მაგრამ ნაბიჯი პირველად რუსეთმა უნდა გადადგას. სწორედ მან დაარღვია უკრაინისა და საქართველოს ტერიტორიული მთლიანობა და ეს საკითხები მეორე პლანზე არ უნდა გადავიდეს.“- აცხადებს ჰანი.

ევროკომისრის თქმით, ის ვერ ხედავს ტენდენციას, რომ მსოფლიოს რომელიმე ქვეყანამ საქართველოს ოკუპირებული ტერიტორიების სუვერენიტეტი აღიაროს:

„ვფიქრობ, არა გვაქვს საფუძველი, მოვლენათა ამგვარ განვითარებას ველოდოთ. მეტიც, ვერ ვამჩნევ ტენდენციებს, რომ რომელიმე ქვეყანამ, თუნდაც არაევროპულმა, ახლო მომავალში საქართველოს ამ რეგიონების სუვერენიტეტი აღიაროს.“- აღნიშნავს იოჰანეს ჰანი.