კადიევის ექსტრადირების ბრძანებაზე ხელმოწერას არ ვაპირებ- თეა წულუკიანი

პოლიტიკა - 13:15, 17 Jan, 2015

1949

გადაცემა "პირველ სტუდიაში" სტუმრობისას იუსტიციის მინისტრმა მიკაილ კადიევის რუსეთში ექსტრადირების საკითხზეც ისაუბრა და აღნიშნა, რომ ამ თემაზე იგი ბრძანების გამოცემას არ აპირებს.

თეა წულუკიანი მიიჩნევს, რომ მისი მეზობელ სახელმწიფოში ექსტრადირება ადამიანის უფლებათა დარღვევა იქნება და დასძენს, რომ კადიევთან დაკავშირებით, პროკურატურასაც იგივე პოზიცია აქვს.

"საქართველოდან სხვა ქვეყანაში პირის ექსტრადიციაზე ბრძანებას ხელს აწერს იუსტიციის მინისტრი, მე პირადად ასეთ 44 ბრძანებაზე მაქვს ხელი მოწერილი, მაგრამ კადიევის ექსტრადირების ბრძანებაზე ხელმოწერას არ ვაპირებ, პროკურატურის პოზიცია იგივეა, ჩვენ ვთვლიტ რომ კადიევის რუსეთში ექსტრადიცია იქნებოდა ადამიანის უფლებების დარღვევა“- განაცხადა თეა წულუკიანმა.

მიკაილ კადიევი სამართალდამცველებმა 2013 წელს იარაღის უკანონო შენახვისთვის დააკავეს, მას პატიმრობის ვადა მიმდინარე წლის ივნისში ეწურება. ამჟამად კი პატიმრობაში მყოფი მიკაილ კადიევი, რომელსაც ლტოლვილის სტატუსის მინიჭებაზე დევნილთა და განსახლების სამინისტრომ უარი უთხრა, ამ სტატუსის მოსაპოვებლად უზენაეს სასამართლოში იბრძვის.