საგარეო საქმეთა მინისტრი ავიარეისებთან დაკავშირებით რუსეთის და საქართველოს საგარეო უწყებების მიმოწერაზე „ნაციონალური მოძრაობის“ განცხადებას ეხმაურება.

თამარ ბერუჩაშვილის ინფორმაციით, საქართველო-რუსეთს შორის რეგულარული ავიარეისების აღდგენის შესახებ მოლაპარაკებები აბაშიძე-კარასინის ფორმატში დაიწყო.

„ამ თემასთან დაკავშირებით დიალოგი აბაშიძე-კარასინის დიალოგის ფარგლებში დაიწყო, რომელზეც საზოგადოება ინფორმირებული იყო. ამის შემდეგ ამაზე საავიაციო სამსახურები მუშაობდნენ. ის შეთანხმება, რომელიც მხარეთა შორის ჩამოყალიბდა, შვეიცარიის საელჩოს მეშვეობით, რუსეთის შესაბამის უწყებებს გადაეცათ. ამ თემის დეტალები, შეთანხმება და პრობლემები იმ უწყებების მიმართ კითხვებია, რომლებიც პროცესში უშუალოდ იყვნენ ჩართული“, - აცხადებს ბერუჩაშვილი.

რუსეთის საგარეო საქმეთა სამინისტროსა და საქართველოს საგარეო საქმეთა სამინისტორს მიმოწერას ერთიანი ნაციონალური მოძრაობის აღმასრულებელი მდივანი ზურაბ ჯაფარიძე ასაჯაროვებს.

ჯაფარიძის ინფორმაციით, სამინისტროებს შორის მიმოწერა 2014 წლის ივნისიდან მიმდინარეობს.

გამოქვეყნებული წერილის მიხედვით, ოფიციალური საქართველო თანახმაა, რუსეთის ყველა მოთხოვნა დააკმაყოფილოს.