ალასანია ,,ნაციონალებთან“ შესაძლო ალიანსზე - ,,ამ პარტიასთან ბატონი ბიძინა იყო ასოცირებული“

პოლიტიკა - 17:37, 16 Jan, 2015

4151

ბოლო დროს ‘ნაციონალურ მოძრაობასთან” ‘თავისუფალი დემოკრატების“ ლიდერების ფარულ შეხვედრებსა და კონსულტაციებთან დაკავშირებით გავრცელებულ ინფორმაციებს, ალასანია ხელისუფლების მიერ მართული მედიის მხრიდან სპეციალურად, მათი იმიჯის შესალახად გავრცელებულს უწოდებს. ამის შესახებ მან ,,გურიის მოამბეში“ სტუმრობისას განაცხადა.

ალასანიამ აღნიშნა, რომ ‘ნაციონალურ მოძრაობასთან“ ალიანსი გამორიცხულია და 2016 წლის არჩევნებში პარტია დიდი ალბათობით დამოუკიდებლად მიიღებს მონაწილეობას.

_„თავისუფალი დემოკრატები ძალიან განვსხვავდებით ‘ნაციონალური მოძრაობისგან“, თვისობრივია სხვაობა ჩვენსა და კოალიციაში შემავალ პარტიებს შორისაც. „ნაციონალები“ 9 წელი იყვნენ ხელისუფლებაში წარმატებებით თუ დიდი წარუმატებლობით და დაამთავრეს პოლიტიკურ მართვაში ყოფნა. მეეჭვება, მათ შეძლონ ისევ უმრავლესობის მოპოვება პარლამენტში. ალბათ გააგრძელებენ ოპოზიციურ მოღვაწეობას და რაც მეტი იქნება პლურალისტური მოსაზრება პარლამენტში თუ საზოგადოებაში, დემოკრატიისთვის უკეთესია. შეიძლება სპეციალურად ავრცელებს მსგავს ინფორმაციებს ღარიბაშვილ-ივანიშვილის მედია საშუალებები, რომ სურთ ამ კუთხით შელახონ ჩვენი იმიჯი.

_თქვენი იმიჯის შელახვას ნიშნავს, „ნაციონალებთან“ ერთგვარი კონსულტაციები ან თუნდაც შესაძლო პოლიტიკურ ალიანსზე საუბარი?

_ რა თქმა უნდა, ჩვენ პირველები დავუპირისპირდით „ნაციონალურ მოძრაობას“, მანამ, სანამ თუნდაც ღარიბაშვილი და ივანიშვილი მოვიდოდა ხელისუფლებაში, დავინახეთ, რომ ქვეყანა არასწორი გზით მიდიოდა და დავტოვეთ თანამდებობები.

მაშინ, მთლიანად ასოცირებული იყო ამ პარტიასთან ბატონი ბიძინა. ამიტომ, ჩვენთვის წარმოუდგენელია, პოლიტიკურ ალიანსში ვიყოთ იმ პარტიასთან, რომელთანაც გვქონდა შეუთავსებლობა. ეს არ ნიშნავს იმას, რომ „ნაციონალური მოძრაობის“ დეპუტაციასთან ერთად, პარლამენტში არ შეიძლება ქვეყნისთვის საჭირბოროტო საკითხზე ერთობლივი პოზიციის დაფიქსირება. ჩვენ უნდა ვისწავლოთ პარლამენტში კომპრომისები. სიძულვილით რომ გვქონდა გაჟღენთილი პოლიტიკა, ამან მიგვიყვანა იქამდე, რაც ხდებოდა ბოლო წლებში. ჩვენ უნდა ვისწავლოთ პოლიტიკის კეთება კონსესუსის მიღწევის გზით. და არა დაპირისპირების და ტალახის სროლის გზით. ჯერ ნაადრევია რაიმე პოლიტიკურ ალიანსზე საუბარი, არ ვიცით როგორ განვითარდება მოვლენები, მაგრამ მაღალი ალბათობით ჩვენ დამუკიდებლად გავალთ არჩევნებზე 2016 წელს.