საპარლამენტო უმრავლესობის ლიდერი დავით საგანელიძე პარლამენტის საგაზაფხულო სესიაზე, პოსტებიდან კომიტეტების თავმჯდომარეების, გიორგი ცაგარეიშვილის, ვიქტორ დოლიძის, დავით ონოფრიშვილისა და ასევე, ვიცე-სპიკერების - მურმან დუმბაძისა და ზურაბ აბაშიძის გათავისუფლების საკითხს დააყენებს.

„ვიცე-სპიკერებისა და კომიტეტის თავმჯდომარეების პოსტების თაობაზე განცხადება რამდენჯერმე გავაკეთე. უმრავლესობის ლიდერი ვარ და ბუნებრივია, უმრავლესობის კვოტას ვიცავ, რაც დარღვეულია. აღნიშნულ საკითხზე ფრაქციებთან და პოლიტსაბჭოს სხდომაზე მსჯელობა ჯერ არ ყოფილა, მაგარამ საკითხს განხილვისთვის დავაყენებ. რა თქმა უნდა, ეს უმრავლესობის გადასაწყვეტია. ვიცე-სპიკერისა და კომიტეტის თავმჯდომარეების საკითხს დავაყენებ. მიუხედავად იმისა, რომ ამ ადამიანებს ძალიან დიდ პატივს ვცემ, აქ პირად სიმპატია-ანტიპატიაზე საუბარი არ არის. საუბარია, პარლამენტის რეგლამენტზე, წესსა და იმ კვოტებზე, რაც უმრაველესობასა და უმცირესობას აქვთ. ამ შემთხვევაში რეგლამენტი დაცული უნდა იყოს“, - განაცხადა საგანელიძემ.

„თავისუფალი დემოკრატების“ წარმომადგენლებს, გარემოს დაცვის კომიტეტის თავმჯდომარეს, გიორგი ცაგარეიშვილს, ევროინტერგაციის კომიტეტის ხელმძღვანელს, ვიქტორ დოლიძესა და საფინანსო-საბიუჯეტო კომიტეტის თავმჯდომარეს, დავით ონოფრიშვილს შესაძლოა პოსტების დატოვება მოუწიოთ.

შესაძლოა თანამდებობის დატოვება მოუწიოს ვიცე-სპიკერ ზურაბ აბაშიძესაც, რომელსაც ეს თანამდებობა უმრავლესობის კვოტით უკავია. ამ თანამდებობების დატოვება მათ იმიტომ უწევთ, რომ ცოტა ხნის წინ კოალიცია დატოვეს და ოპოზიციაში გადავიდნენ.