საგარეო საქმეთა მინისტრის თქმით, საქართველოს ხელისუფლებამ ბოლო ორი წლის განმავლობაში ევროატლანტიკური ინტეგრაციის კუთხით მნიშვნელოვან პროგრესს მიაღწია.

ამის შესახებ ბერუჩაშვილმა „პარტნიორობა ღია მმართველობისათვის“ პროგრამის ფარგლებში სამინისტროს ორწლიანი საქმიანობის ანგარიშის წარდგენისას განაცხადა.

„ბოლო ორი წლის განმავლობაში მნიშვნელოვან პროგრესს მივაღწიეთ ევროატლანტიკური ინტეგრაციის კუთხით. ნატო-ს უელსის სამიტზე საქართველომ მიიღო ჩრდილოატლანტიკური ალიანსის „არსებით ღონისძიებათა პაკეტი“, რომლის მიზანიც ქვეყნის თავდაცვითი შესაძლებლობების გაძლიერებასთან ერთად, საქართველოს ჩრდილოატლანტიკურ ალიანსში გაწევრიანებისთვის მომზადებაა. ასევე მიღებულ იქნა გადაწყვეტილება ნატო-საქართველოს ერთობლივი საწვრთნელი ცენტრის ჩამოყალიბების თაობაზე. გარდა ამისა, საქართველო მიიწვიეს ნატო-ს „პარტნიორობის თავსებადობის ინიციატივასა“ და „გაძლიერებულ შესაძლებლობათა“ ქვეყნების ჯგუფში.2013-2014 წლები წარმატებული იყო "აღმოსავლეთ პარტნიორობის" საგზაო რუკით განსაზღვრული სხვა პრიორიტეტების შესრულების მიმართულებითაც. სასიხარულოა, რომ თბილისი ერთგვარ ცენტრად იქცა "აღმოსავლეთ პარტნიორობის" მრავალმხრივი ღონისძიებებისა და შეხვედრებისთვის", - განაცხადა ბერუჩაშვილმა.