ექსპერტი ნიკა ჩიტიძე ავიარეისებთან დაკავშირებით რუსეთის და საქართველოს საგარეო უწყებების მიმოწერაზე „ნაციონალური მოძრაობის“ განცხადებას ეხმაურება.

როგორც „ნიუპოსტთან“ საუბარში ჩიტიძემ განაცხადა, იმ შემთხვევაში თუ მოსკოვი-თბილისი-მოსკოვი მარშრუტზე 12 რუსული ავიაკომპანიის დაშვება მოხდება, ეს გავლენას უცხოურ კომპანიებზეც მოახდენს.

„შესაძლოა შემცირდეს უცხოური კომპანიების გავლენა და მათი წილი, რადგან აქ საუბარი შეიძლება იყოს, არა მხოლოდ თბილისის-მოსკოვის, არამედ ევროპის მიმართულებითაც. მაგალითად,საქართველოს ბევრი მოქალაქე შეიძლება ევროპაში მოსკოვის გავლით გაემგზავროს. თუ საქართველოს მოქალაქე ჩაფრინდება მოსკოვში, ამ შემთხვევაში მას არ ევალება რუსეთის ვიზის ქონა, რადგან ის რუსეთის სახელმწიფო საზღვარს არ გადაკვეთავს. პირიქით, დარჩება აეროპორტის ტერიტორიაზე და მოსკოვიდან შეეცდება გაემგზავროს ევროპის ნებისმიერი ქვეყნის მიმართულებით. ალბათ ამ ყველაფერს მოჰყვება რუსული კომპანიების კიდევ უფრო გააქტიურება ქართულ საავიაციო ბაზარზე და იგივე შემცირდება ქართული კომპანიის გავლენა“, - განაცხადა ჩიტიძემ.

ექსპერტის თქმით, თუ დადასტურდა ისიც, რომ ქართულ ბაზარზე პუტინთან დაახლოებული რუსული კომპანიები შემოვლენ, ეს დასავლეთთან ურთიერთობაზე უარყოფით გავლენას მოახდენს.

„როდესაც საუბარია სანქციებზე ბუნებრივია ამ შემთხვევაში საქართველო უნდა მიეურთდეს სანქციებს, რომელიც დაწესებულია რუსული კომპანიების მხრიდან. მითუმეტეს, თუ ეს კომპანიებს ახლო ურთიერთობა აქვთ რუსეთის ხელისუფლებასთან. თუ ისე მოხდა, როგორც ნაციონალების მიერ გვარცელებულ განცხადებაშია ნათქვამი, ეს დასავლეთთან ურთიერთობაზე უარყოფით გავლენას მოახდენს“, - განაცხადა „ნიუპოსტთან“ საუბარში ჩიტიძემ.

რუსეთის საგარეო საქმეთა სამინისტროსა და საქართველოს საგარეო საქმეთა სამინისტორს მიმოწერას ერთიანი ნაციონალური მოძრაობის აღმასრულებელი მდივანი ზურაბ ჯაფარიძე ასაჯაროვებს.

ჯაფარიძის ინფორმაციით, სამინისტროებს შორის მიმოწერა 2014 წლის ივნისიდან მიმდინარეობს.

გამოქვეყნებული წერილის მიხედვით, ოფიციალური საქართველო თანახმაა, რუსეთის ყველა მოთხოვნა დააკმაყოფილოს.