სრულიად საქართველოს კათოლიკოს-პატრიარქმა ილია ΙΙ-მ ევროპული სამეზობლო პოლიტიკისა და გაფართოების საკითხებში ევროკომისარი იოჰანეს ჰანი მიიღო.

პატრიარქის და სამეზობლო პოლიტიკისა და გაფართოების საკითხებში ევროკომისარის შეხვედრას ევროკავშირის წარმომადგენლობის ხელმძღვანელი საქართველოში იანოშ ჰერმანი და ევროკომისრის თანმხლები პირები დაესწრნენ.

ილია მეორემ მადლობა გადაუხადა სტუმარს მობრძანებისთვის და იმ პროცესის მნიშვნელობის შესახებ ისაუბრა, რაც საქართველოსა და ევროკავშირს შორის ვითარდება. პატრიარქმა ხაზი გაუსვა საქართველოს ტერიტორიული მთლიანობის პრობლემას და გამოთქვა მადლიერება იმ მხარდაჭერის გამო, რომელსაც ევროკავშირი და მისი წევრი ქვეყნები საქართველოს მიმართ გამოხატავენ.

იოჰანეს ჰანმა ერთიანობისა და თავისუფლებისათვის ბრძოლაში საქართველოს მართლმადიდებელი ეკლესიის და პირადად მისი უწმიდესობის გამორჩეულ როლზე ისაუბრა და აღნიშნა, რომ ბრიუსელში კარგად იცნობენ საქართველოს მწყემსმთავრის საქმიანობას, დიდად აფასებენ მას და ზოგადად საქართველოს მართლმადიდებელ ეკლესიას.

ევროკომისარმა კიდევ ერთხელ დაადასტურა მხარდაჭერა საქართველოს ტერიტორიული მთლიანობისადმი და გამოთქვა იმედი, რომ საქართველო წარმატებით გაართმევს თავს ევროკავშირში ინტეგრირების პროცესს.