საგარეო საქმეთა მინისტრი, თამარ ბერუჩაშვილი ევროპული სამეზობლო პოლიტიკისა და გაწევრიანების შესახებ მოლაპარაკებების საკითხებში ევროკომისარს, იოჰანეს ჰანს შეხვდა.

როგორც შეხვედრის დასრულების შემდეგ ჰანმა განაცხადა, ბერუჩაშვილთან ვიზა ლიბერალიზაციის საკითხებზე და ოკუპირებულ ტერიტორიებზე არსებულ ვითარებაზე ისაუბრეს.

„ჩვენ განვიხილეთ ვიზის ლიბერალიზაციის საკითხები. მოგეხსენებათ, რომ საქართველო ამ პროცესის მეორე ეტაპზეა და ვიმედოვნებთ, რომ პოზიტიური შედეგი დადგება. ამასთან ჩვენ შევეხეთ ტერიტორიული მთლიანობის საკითხს. კვლავ ვრჩებით იმ პოზიციაზე, რომ ნებისმიერი სახის ინტერვენცია დაუშვებელია“, - განაცხადა ჰანმა.

ამ დროისთვის ევროკომისარი საქართველოს პრემიერ-მინისტრს ხვდება. შეხვედრის დასრულების შემდეგ ირაკლი ღარიბაშვილი და იოჰანეს ჰანი მედიისთვის განცხადებას გააკეთებენ.