პარლამენტის ქუთაისის სასახლეში საახალწლო ღონისძიება გაიმართა, რომელსაც იმერეთის რეგიონის ბავშვთა სახლების - „ჯადოსნური სამყაროს“, „თაირისის“, „ხიდი სოციალური ინკლუზივისთვის“, „საქართველოს კარიტასის“, „ეს-ო-ეს ბავშვთა სოფლის“ აღსაზრდელები, შეზღუდული შესაძლებლობის მქონე, აფხაზეთიდან დევნილი და სოციალურად დაუცველი ოჯახების ბავშვები დაესწრნენ.

საახალწლო წვეულებას დაესწრო საქართველოს პარლამენტის თავმჯდომარე, დავით უსუფაშვილი და დეპუტატები.

„მინდა, კიდევ ერთხელ, ყველას მოგილოცოთ ახალი 2015 წელი. დღეს მე ვაცხადებ, რომ საქართველოს პარლამენტი ასრულებს ახალი წლის მილოცვებს და ახალ წელს იწყებს შრომას, მუშაობას. დღეს საქართველოს პარლამენტის ქუთაისის შენობას სტუმრობენ ბავშვები სხვადასხვა სკოლებიდან, ბავშვთა სახლებიდან და დარწმუნებული ვარ, რომ მოვახერხეთ მათთვის ერთი ძალიან ლამაზი დღის ჩუქება. ასე რომ, დიდი მადლობა ყველას, ვინც ორგანიზება გაუკეთა ამ ღონისძიებას. ჩვენ გვქონდა ასეთი ღონისძიება თბილისში, გვაქვს ქუთაისშიც. ყველას გილოცავთ ახალ წელს“, - განაცხადა დავით უსუფაშვილმა.

ღონისძიებაზე მოწვეული ბავშვების გართობაზე წამყვანი - გიორგი გოგიჩაიშვილი, სტუდია „ბზიკები“, "ქუჩის თეატრის" მსახიობები, თოვლის ბაბუები და ზღაპრის გმირები ზრუნავდენ. ბავშვებს, საქართველოს პარლამენტის სახელით, საჩუქრებიც გადაეცათ.

ღონისძიება, რომელიც 14:00 საათზე დაიწყო, 16:00 საათამდე გაგრძელდა.