პრემიერ-მინისტრის თქმით, გარემოს დაბინძურებაზე ჯარიმის დაწესებით მთავრობა ცდილობს მოსახლეობაში გარემოს დასაცავად შესაბამისი ჩვევები დაამკვიდროს.

ამის შესახებ ირაკლი ღარიბაშვილმა მთავრობის სხდომის დაწყებამდე განაცხადა.

„ვიცით, რომ დაწესდა საკმაოდ მკაცრი ჯარიმები. მინდა მოსახლეობას კიდევ ერთხელ განუმარტო, რომ გარემოს დანაგვიანებისთვის ჯარიმა იქნება 50 ლარიდან მაქსიმუმ 5 000 ლარამდე. ამგვარი გადაწყვეტილების მიღება სამწუხაროდ თუ საბედნიეროდ, აუცილებელი იყო იმისთვის, რომ ერთხელ და სამუდამოდ, დავამკვიდროთ შესაბამისი ჩვევები გარემოს დასაცავად და თავიდან ავიცილოთ მისი დაბინძურება. კოდექსის აღსრულებაზე იმუშავებენ გარემოს დაცვის სამინისტროს გარემოსდაცვითი ზედამხედველობითი დეპარტამენტი, საპატრულო დეპარტამენტი და ყველა ქალაქსა და რაიონში შესაბამისი მუნიციპალური სამსახურები. მნიშვნელოვანია თითოეულმა მოქალაქემ კარგად გააცნობიეროს, რომ გარემოს დაბინძურებისგან დაცვა არის ყოველი ჩვენგანის ვალი“, - განაცხადა პრემიერმა.