ექსპერტი უსაფრთხოების საკითხებში ნიკა ლალიაშვილი მიიჩნევს, რომ უკანონო ფორმირებებში ჩართვასთან დაკავშირებით დაგეგმილი ცვლილებები უკრაინაში მებრძოლ ქართველებს არ უნდა შეეხოთ.

როგორც ტელეკომპანია „იმედის“ ეთერში ლალიაშვილმა განმარტა, ამ შემთხვევაში სახელმწიფომ კანონში უნდა გააკეთოს ჩანაწერი, რომ რეგულაციები გავრცელდება ტერორისტულ ორგანიზაციებში მონაწილე მოქალაქეებზე.

„ამ რეგულაციებში უკრაინა არ უნდა მოექცეს. უკრაინიდან საქართველოში დაბრუნებული ქართველი მებრძოლები არ წარმოადგენენ საფრთხეს ჩვენი ქვეყნის უსაფრთხოებისთვის. თუმცა ისლამური ხალიფათის ოპერაციებიდან წარმოადგენენ ჩვენი ქვეყნისთვის საფრთხეს. ამიტომ უნდა ჩაიწეროს კანონში, რომ დასჯადი იქნება უცხო ქვეყნის ტერიტორიაზე არსებული ტერორისტული ორგანიზაციებში მონაწილეობა. ტერორისტული ორგანიზაციების სია არსებობს და ამ სიით უნდა იხელმძღვანელოს საქართველოს კანონმდებლობამ“, - განაცხადა ლალიაშვილმა.

იუსტიციის მინისტრის განცხადებით უკანონო შეიარაღებულ ფორმირებებში მონაწილეობა დასჯადი გახდება. წულუკიანის თქმით, მთავრობამ პარლამენტს საკანონმდებლო ინიციატივა უკვე გაუგზავნა, რომლის დამტკიცების შემთხვევაში უკანონო შეიარაღებულ ფორმირებებში მონაწილეობა 2 წლით თავისუფლების აღკვეთით დაისჯება.