ესტონეთის პრემიერ-მინისტრის ტაავი რიივასის განცხადებით, საქართველოს წილი ესტონურ ბაზარზე 0,1%-ია, რაც შეიძლება გაიზარდოს.

ამის შესახებ რიივასმა საქართველო-ესტონეთის ბიზნესფორუმზე განაცხადა.

მისი თქმით, საქართველოს და ესტონეთს ბევრი საერთო გააჩნიათ და ეს შესაძლებლობა გამოყენებული უნდა იქნას.

„საქართველომ ბევრი სწორი გადაწყვეტილება მიიღო, რამაც ქვეყანას ზოგიერთ რეიტინგში უფრო მაღალი პოზიცია მოუტანა, ვიდრე ესტონეთს აქვს. ვგრძნობ, რომ უფრო სასარგებლო იქნება, თუ მჭიდროდ ვითანამშრომლებთ და ასევე, გავამყარებთ ბიზნესკავშირებს. აქ იმყოფება ესტონეთის დელეგაცია. ეს არის კარგი შესაძლებლობა და მოგიწოდებთ, რომ დაამყაროთ უფრო მჭიდრო ბიზნესკავშირები. იმედს გამოვთქვამ, რომ თქვენ მიიღებთ სარგებელს და გექნებათ აყვავებული მომავალი. რაც არ უნდა დაისახოთ მიზნად, მიაღწევთ და ამ გზაზე ესტონეთი თქვენს გვერდით იქნება“, - განაცხადა რიივასმა.