ბოლო დროს მომხდარმა გახმაურებულმა ტერაქტებმა მსოფლიოს დიდი ნაწილი ტერორიზმის წინააღმდეგ გააერთიანა. გაჩნდა შიში, რომელიც ტერორიზმის გლობალური მასშტაბებიდან გამომდინარე უსაფუძვლო ნამდვილად არ არის.

მსოფლიოსთვის ტერორიზმი რადიკალურ ისლამისტურ ორგანიზაციებთან ასოცირდება, იქიდან გამომდიმარე, რომ ისლამისტური სახელმწიფოს რიგებში რამდენიმე საქართველოს მოქალაქეც იბრძვის, ერთერთი მათგანი კი ამ სახელმწიფოს ერთ-ერთ ლიდერად გვევლინება ჩნდება კითხვა, ემუქრება თუ არა საქართველოს ტერორიზმის საფრთხე. რადიკალური ისლამისტური დაჯგუფებებისთვის ხომ ეთნიკურობის ცნება არ არსებობს.

შესაძლო საფრთხეების შესახებ ექსპერტმა მამუკა არეშიძემ გაზეთ „რეზონანსთან“ ისაუბრა.

არეშიძის თქმით, საქართველოში ტერორიზმის საფრთხე რეალურია, უფრო მოსალოდნელი არის ის, რომ შესაძლოა თავდასხმა მოხდეს საქართველოში მყოფ უცხო ქვეყნის მოქალაქეებზე, მაგრამ მთავრობას შეუძლია პრევენციული ღონისძიებების გატარება.

„ტერაქტების სერია შესაძლოა მსოფლიოში გაგრძელდეს და არ არის გამორიცხული ეს საქართველოში მოხდეს. თუმცა არა საქართველოს მოქალაქეების, არამედ უცხოური წარმომადგენლობების, ევროკავშირისა და აშშ-ის მოქალაქეების წინააღმდეგ. მითუმეტეს რომ „ალ-ქაიდას“ ხელმძღვანელობამ ოფიციალური განცხადებები გააკეთა და პირდაპირ თქვა, რომ ამგვარად მოხდება“-განაცხადა მამუკა არეშიძემ.

ექსპერტმა ხელისუფლებას მოუწოდა შეკრიბოს საზოგადოების კომპეტენტური წარმომადგენლები და მათი აზრი გაითვალისწინოს.