ბიძინა ივანიშვილი ახალი წლიდან მასმედიაში „დაბრუნდება“. პროექტი „2030“ TV-GDS-ის ეთერში თებერვლიდან, 20 საათსა და 30 წუთზე გავა და როგორც მისი პროდიუსერი, ვასილ მაღლაფერიძე ამბობს, პირველი, მეორე, მესამე და საერთოდ, გადაცემის ყველაზე ხშირი "სტუმარი" სწორედ ბიძინა ივანიშვილი იქნება:

„ჯერ ერთი, საიდან ჩანს, რომ ივანიშვილს მედიაბაზარზე გავლენის მოპოვება სურს - მგონი, ამ კაცს, გამოჩენის დღიდან ერთი პრობლემა აქვს - როგორ მოიშოროს ეს გავლენა და რაში უნდა სჭირდებოდეს ამ გავლენის მოპოვება? ანდა, ხომ ჰქონდა მეცხრე არხი და მისი საშუალებით გავლენას ვერ მოიპოვებდა ? თუ „მაესტროს“ ყიდვა უნდოდა, ვერ იყიდდა? იქნებ, „რუსთავი 2“- ია ისეთი უმწიკვლო, რომ არ მიეყიდა?! აბსურდია ეს ყველაფერი და მაშინაც სწორი იყო ივანიშვილი, როცა ეს არხი დახურა. გადაცემის თარიღს კონკრეტულად ვერ დავკიდებთ, მაგრამ ალბათ, ეთერში თებერვლიდან გავა. ამისათვის ყოველდღიურად ვმუშაობთ. საზოგადოების არ ვურჩევ ასეთ მოლოდინს, რაკი ეს გადაცემა გავა, აწი რაღა გვიჭირს, არაგვიც აღმა წავაო, მაგრამ, რა თქმა უნდა, თავსაც არ მოვიჭრით და ქართული ტელესივრცისთვის ერთი რიგიანი გადაცემა გამოვა. ეს იქნება საინფორმაციო ანალიტიკური გადაცემა, რომელსაც მაკა ცინცაძე, ირაკლი შამანაძე და გიორგი უძილაური წაიყვანენ“- აცხადებს ვასილ მაღლაფერიძე.

წყარო - "ვერსია"