საპარლამენტო უმრავლესობის წევრი თინა ხიდაშელი Charlie Hebdo-ს რედაქციაზე მომხდარ თავდასხმას სოციალურ ქსელში ეხმაურება.

„ძალადობა არაფრის პასუხი არ არის. ძალადობს მხოლოდ სუსტი, საკუთარი კომპლექსების დასამალად და გადასაძალად.

ძალადობით შედეგი რომ არ მიიღწევა დღეს კიდევ ერთხელ დადასტურდა -- გუშინ იყო ერთი კარიკატურა, რომელიც სულ რამდენიმე ათასმა ადამიანმა ნახა, დღეს უკვე ასეულობით კარიკატურაა რომელსაც ათეულობით მილიონი ადამიანი ნახულობს, და ხვალ ათასობით გაჩნდება რომელსაც კიდევ უფრო მეტი ნახავს. ამ ჟურნალის შესახებ ასევე შესაძლოა მხოლოდ მისმა მკითხველმა იცოდა, დღეს ალბათ მსოფლიომ იცის.

ყველა მოძალადისთვის ასეთი გაკვეთილები ყოველდღიურად იქმნება.

ძალადობა შედეგს ვერ აღწევს.

სიკეთე, სიყვარული, თავისუფლებისთვის ბრძოლა კი მუდამ იმარჯვებს. ჩვენ ბევრნი ვართ. გაცილებით მეტნი ვიდრე მოძალადენი და ყოველი ჩვენგანის მოკვლის შემდეგ ასობით და ათასობით ამოვიზრდებით ხოლმე.

ასეთია თანამედროვე სამყაროს ლოგიკა. ლოგიკა მარტივი და მარადიული. სიყვარული, სიკეთე, თავისუფლება კარგია, გამშვიდებს, გაბედნიერებს, მისთვის სიკვდილის მომენტშიც კი მშვიდი და ბედნიერი ხარ.

ბოროტი დევების ამბავი, ბავშვობაში ზღაპრებში რომ წაგვიკითხვას, ერთ მოჭრილ თავზე ასი რომ ამოდიოდა მხოლოდ ზღაპრებში ხდება.

სიკეთე იმარჯვებს, სიკეთე მრავლდება, სიკეთეს ბოლო, საზღვარი არ აქვს“, - წერს ხიდაშელი.