დავით უსუფაშვილი საქველმოქმედო ფონდ „იავნანას“ ესტუმრა

პოლიტიკა - 19:47, 08 Jan, 2015

1450

საქართველოს პარლამენტის თავმჯდომარე, დავით უსუფაშვილი, საერთაშორისო საქველმოქმედო ფონდ „იავნანას“ ესტუმრა. ფონდის პრეზიდენტმა, პაატა ბურჭულაძემ, პარლამენტის თავმჯდომარეს ჩატარებული საქველმოქმედო ღონისძიებების ამსახველი ფოტო-გამოფენა დაათვალიერებინა.
მისი თქმით, ფონდმა თავისი არსებობის განმავლობაში, 107 მრავალშვილიან ოჯახს საცხოვრებელი სახლი შეუძინა და ათასზე მეტი ბავშვი ოჯახებს დაუბრუნა.
„ერთად გადავარჩინოთ მომავალი" - მსოფლიოში აღიარებულმა საოპერო მომღერალმა პაატა ბურჭულაძემ 2004 წელს ასეთი მოწოდებით დაარსა საერთაშორისო საქველმოქმედო ფონდი "იავნანა, რომელიც ობოლი და მზრუნველობამოკლებული ბავშვებისთვის საიმედო თავშესაფრი გახდა.
პაატა ბურჭულაძე დავით უსუფაშვილს მახათას მთაზე ივერიის ღვთისმშობლის ხატის სახელობის ტაძრის მშენებლობის შესახებაც ესაუბრა და მშენებლობის პროცესი პირდაპირი ვიდეო-ჩართვის საშუალებით დაათვალიერებინა.
„მახათას მთაზე სამონასტრო კომპლექსთან ერთად საგანმანათლებლო ცენტრი განთავსდება, რომელიც ხელს შეუწყობს საქართველოში ქრისტიანული სწავლების გავრცელებას. იქნება თავშესაფარი ობოლი და მზრუნველობამოკლებული ბავშვებისათვის, მონასტერთან ასევე დაფუძნდება ნარკოლოგიის სარეაბილიტაციო ცენტრი“, - აღნიშნა პაატა ბურჭულაძემ.
2010 წელს საქართველოს კათოლიკოს–პატრიარქის ლოცვა–კურთხევით პაატა ბურჭულაძის მიერ დაარსდა ივერიის ღვთისმშობლის ხატის სახელობის ტაძრის მშენებლობის ფონდი "ივერიისა", რომელიც სათავეში ჩაუდგა აღნიშნულ პროექტს.
შეხვედრის დასასრულს, პაატა ბურჭულაძემ პარლამენტის თავმჯდომარე, დავით უსუფაშვილი მისი 60 წლისთავისადმი მიძღვნილ საიუბილეო საღამოზე მიიწვია, რომლის გამართვაც 2015 წლის 12 თებერვალს იგეგმება.