ეკონომიკის მინისტრის მოადგილის დიმიტრი ქუმსიაშვილის თქმი, სახელმწიფო ქონების ეროვნული სააგენტო სახელმწიფო ქონების ინვენტარიზაციის სრულმასშტაბიან პროექტს იწყებს. ამის შესახებ ქუმსიაშვილმა ჟურნალისტებთან საუბრისას განაცხადა.

მისი თქმით, ინვენტარიზაციის პროექტი მთელი ქვეყნის ტერიტორიას მოიცავს.

ქუმსიშვილის განმატებით, პროექტის მიზანია სახელმწიფო ქონების აღრიცხვა და რეგისტრაცია ქვეყნის მასშტაბით.

„ინვენტარიზაციის შედეგად შესაძლებელი იქნება სახელმწიფო ქონების ზუსტი რაოდენობის დადგენა და გამოუყენებელი აქტივების ეკონომიკურ ბრუნვაში ჩართვა. ამ პროექტით გამჭვირვალე გახდება პრივატირების პროცესები, რაც ეკონომიკურ განვითარებაზე დადებითად აისახება. ინვენტარიზაციის საპილოტე პროექტი 2013 წლის მარტიდან დაიწყო, რომლის შედეგად თბილისის 15 რაიონი და გარდაბანის მუნიციპალიტეტის ნაწილი აღიწერა. თბილისში სულ 625 აღურიცხავი სახელმწიფო ობიექტი გამოვლინდა, ხოლო გარდაბანში - 122 ობიექტი. პრივატიზებიდან შემოსავალმა გასულ წელს 3 მილიონი ლარი შეადგინა. ეს მასშტაბური პროექტი სააგენტოს სამხარეო ცენტრებში და თბილისში 3 ორკაციანი მობილური ჯგუფის ჩამოყალიბებას ითვალისწინებს, რომლებიც აღჭურვილი იქნებიან ავტოსატრანსპორტო საშუალებებით და ინვენტარიზაციისთვის საჭირო გეოლოგიური, გეოფიზიკური ხელსაწყოებით“, - აღნიშნა ქუმსიშვილმა და განმარტა, რომ ქონების ინვენტარიზაციის პროექტი უკვე დაწყებულია და 2016 წლისთვის დასრულდება.