ჭანტურია უარყოფს სუფსის ენერგეტიკული ცენტრის მშენებლობაში რუსეთის მონაწილეობას

პოლიტიკა - 22:41, 07 Jan, 2015

2679

სუფსაში ენერგეტიკული კომპლექსის მშენებლობაში რუსეთის მონაწილეობაზე საუბარი არ არის - ეს განცხადება ნავთობკორპორაციის ყოფილმა პრეზიდენტმა გიორგი ჭანტურიამ ტელე ,,იმედის“ ეთერში განაცხადა. მისივე განმარტებით, საუბარია ორ სხვადასხვა პროექტზე, ცალკე პროექტია ჩრდილოეთ-სამხრეთის დამაკავშირებელი ნავთობსადენის მშენებლობა, რომელშიც, მათ შორის, რუსეთის და სხვა მხარეების ინტერესების თანხვედრა მოხდება. ჭანტურიამ ხაზი გაუსვა, რომ ის საუბრობს ქართულ-ამერიკული საერთაშორისო ენერგეტიკული ჯგუფის სახელით.

"ჩვენ ვლაპარაკობთ ორ სხვადასხვა პროექტზე. რაც შეეხება სუფსას, ეს არის ძალიან დიდი და სერიოზული პროექტი, რომელიც საქართველოსთვის ახალი არ არის. როდესაც ჩვენ დავიწყეთ ბაქო-სუფსის ნავთობსადენის მშენებლობა, თავიდანვე ჩადებული იყო, რომ ამ პროექტთან ერთად სუფსაში სერიოზული ენერგეტიკული კომპლექსის მშენებლობა უნდა განხორციელებულიყო. 1999 წელს ნავთობგადამამუშავებელი ქარხნის ტექნიკურ-ეკონომიკური დასაბუთება ამერიკის მთავრობამ დააფინანსა და მაშინ ძალიან აქტიურად იმუშავა თედო ჯაფარიძემ, რომელიც აშშ-ში ჩვენი ელჩი იყო. ასე რომ, ეს არ არის ახალი პროექტი და აქ გაოცებას და სიურპრიზებს ადგილი არ აქვს. ჩვენ ვსაუბრობთ იმაზე, რომ ცალკე პროექტად იქნება განხილული ჩრდილოეთ-სამხრეთის დერეფანი, რომელიც მოვა სუფსამდე და რა თქმა უნდა, ინტერესების თანხვედრა მოხდება. ჩვენ, დაპირისპირების ნაცვლად, ვამბობთ, რომ საქართველო უნდა გახდეს ამ პროექტის ინიციატორი, რათა თავი ავარიდოთ "როსნეფტს", არაპროგნოზირებად ქმედებებს და ა.შ.", - განაცხადა ჭანტურიამ. მისი თქმით, ამ ენერგეტიკული პროექტის განხორციელება საქართველოსთვის არის შანსი ახალი რეალობიდან გამომდინარე. ჭანტურია იმედოვნებს, რომ ხელისუფლება ოპტიმალურ გადაწყვეტილებას მიიღებს აღნიშნულ პროექტთან დაკავშირებით.

ინტერნეტ-პორტალი sukhum-moscow.ru-ს ცნობით სუფსაში ენერგეტიკული ჰაბის აშენება იგეგმება, რომელსაც საქართველო რუსეთის მონაწილეობით აპირებს. გამოცემა, რომელიც რუსეთისა და აფხაზეთის ურთიერთობების შესახებ წერს, აღნიშნულ ინფორმაციას პროექტის ავტორ გიორგი ჭანტურიაზე დაყრდნობით ავრცელებს. გამოცემის ინფორმაციით, ენერგეტიკული ჰაბი გარკვეულწილად "მეგობრობის ხიდი" იქნება სამხრეთ კავკასიას, რუსეთსა და ევროკავშირს შორის. პროექტის ღირებულება 17 მილიარდი დოლარია და ინვესტორების მოზიდვა როგორც რუსეთიდან, ისე დასავლეთიდან იგეგმება. ენერგეტიკული ჰაბის ფორმირების პროცესში პირველი პროექტი სუფსაში ნავთობგადამამუშავებელი ქარხანა უნდა იყოს. გარდა ამისა, არსებობს პროექტი ნოვოროსისკიდან სუფსამდე, აფხაზეთის გავლით მილსადენის მშენებლობის პროექტი, რაც ბაქო-თბილისი-ჯეიჰანზე რუსეთის ნავთობსადენების მიერთებას შესაძლებელს გახდის.