,,ისინი, ვინც ლგბტ პირებს 17 მაისს დაერივნენ, ევროპაში იმავე სტატუსით სარგებლობენ“

სოც.მედია - 21:34, 06 Jan, 2015

4816

სოციალური ქსელის მომხმარებელი გიორგი ქათამაძე, რომელიც გასულ წელს ევროპის ახალგაზრდულ ორგანიზაციებში ახალგაზრდული ეგიდით სამუშაო ვიზიტით იმყოფებოდა, ,,ფეისბუქის“ გვერდზე სკანდალურ სტატუსს აქვეყნებს. მისი გადმოცემით, ევროპაში ჩასული ქართველი მამაკაცები სექსუალური ორიენტაციის გამო დევნილის სტატუსით სარგებლობენ. ქათამაძის თქმით, მათ შორის არიან ის მამაკაცები, რომლებიც 17 მაისს თბილისში ლგბტ პირების წინააღმდეგ აქციაზე ამ სტატუსის მქონე ადამიანებს მოსაკლავად დასდევდა.

,,მოგეხსენებათ, რომ გასულ წელს გახლდით სხვადასხვა ევროპულ საერთაშორისო ორგანიზაციაში ახალგაზრდული ეგიდით სამუშაო ვიზიტით. ახლა ვწერ ისეთ რამეს, რაც აქამდე საჯაროდ არასდროს გამიჟღერებია.

ევროკავშირის წევრ სახელმწიფოებში მყოფი ქართველი მამაკაცების სოლიდური ნაწილი იქ იმყოფება სექსუალური ორიენტაციის გამო დევნილის ოფიციალური სტატუსით. ამის მოწმე პირადად გახლავართ, როცა რამდენიმე მათგანის დევნილის მოწმობა ვნახე, სადაც აღნიშნულია დევნილობის მიზეზი - განსხვავებული სექსუალური ორიენტაცია. ეს კიდევ არაფერი... რაღაც ნაწილში მესმის კიდევაც მათი, რადგან საქართველოში ოჯახები ჰყავთ სარჩენი და გამოსაკვები, მაგრამ აღნიშნულებს შორის, რომლებიც გეებად ასაღებენ თავებს, გახლავთ ისეთი მამაკაცები, რომლებიც 2013 წლის 17 მაისს, თბილისში რუსთაველის გამზირზე გამოვიდნენ ლგბტ თემის წინააღმდეგ გამართულ აქციაზე. ახლა კი იმავე სტატუსით, რომლის რეალურად მატარებელ ადამიანებს ლამის მოსაკლავად დაედევნენ, თავად სარგებლობენ ევროპაში.