ბრიტანეთის პრემიერ-მინისტრის დევიდ კამერონის განცხადებით, მას ევროკავშირში ბრიტანეთის ყოფნასთან დაკავშირებით რეფერენდუმის ჩატარება 2017 წლამდე სურს.

კამერონი ზეწოლას საკუთარ კონსერვატიულ პარტიაში მყოფი ევროსკეპტიკოსების, და ბრიტანეთის მემარჯვენე ევროკავშირის მოწინააღმდეგე დამოუკიდებლობის პარტიის მხრიდან განიცდის. დევიდ კამერონი პირობას დებს, რომ გადასინჯავს ევროკავშირის და ბრიტანეთის ურთიერთობას და ჩაატარებს რეფერენდუმს, თუ მისი პარტია საპარლამენტო არჩევნებში გაიმარჯვებს. 4 იანვარს კამერონმა სამაუწყებლო კორპორაცია „ბი-ბი-სის“ განუცხადა, რომ „კმაყოფილი იქნებოდა“, თუ უფრო ადრე შეძლებდა ბრიტანეთის ევროკავშირში ყოფნის თაობაზე რეფერენდუმის ჩატარებას. კამერონის რეფორმების გეგმა ევროკაშირის ქვეყნების მიგრანტთათვის სოციალური უზრუნველყოფისათვის სახელმწიფოს მიერ გამოყოფილი თანხებით სარგებლობის შეზღუდვასაც ითვალისწინებს.