ადამიანის უფლებათა დაცვის კომიტეტის თავმჯდომარის ეკა ბესელიას თქმით, პატიმრობის შესახებ კანონში შესატანი ცვლილებები არის რეფორმების მეორე ეტაპი, რომელიც სისტემურ ცვლილებებს ითვალისწინებს.

ამის შესახებ ბესელიამ ჟურნალისტებთან საუბრისას განაცხადა.

„მთელი რიგი სამართლებრივი რეგულაციები ცვლის არა მარტო სახელწოდებას, არამედ პატიმრების უფლებებს, მათი მოპყრობის წესს, დანაშაულის აღკვეთის საშუალებების გამოყენების წესს, პირობებს და ასე შემდეგ. შეიცვლება ბევრი მნიშვნელოვანი საკითხი, რომელიც პირველ ეტაპზე ვერ მოესწრო. ამით ჩვენ რეფორმის ამ პროცესს დავასრულებთ“, - განაცხადა ეკა ბესელიამ.

პარლამენტში საკომიტეტო მოსმენები პატიმრობის შესახებ კანონში შესატან ცვლილებებთან დაკავშირებით 12 იანვრიდან დაიწყება. რეფორმების ფარგლებში სულ 41 კანონის ცვლილებაა დაგეგმილი.