კოდირის ხეობაში პრეზიდენტის ყოფილი რწმუნებული ემზარ კვიციანი საქართველოს პრეზიდენტს შეწყალებას სთხოვს. შესაბამისი მოთხოვნა პრეზიდენტის ადმინისტრაციაში კვიციანის ადვოკატმა დღეს შეიტანა.

რაც შეეხება პრეზიდენტის განცხადებას, სადაც ის შეწყალების დროს იგი ბრალის აღიარების აუცილებლობაზე საუბრობს, ადვოკატი განმარტავს, რომ ეს სავალდებულო არ არის.

"კონსტიტუციის 73-ე მუხლის "პ" ქვეპუნქტით პრეზიდენტი იწყალებს მსჯავრედბულებს. ვიმოდევნებთ, რომ პრეზიდენტი მოახდენს რეაგირებას და გამოიყენებს კონსტიტუციურ უფლებას", - განაცხადა ადვოკატმა ალექსანდრე კობაიძემ.

ზუგდიდის საქალაქო სასამართლომ ემზარ კვიციანს 16 წლით თავისუფლების აღკვეთა შეუფარდა. ადვოკატებმა აღნიშნული გადაწყვეტილება ქუთაისის სააპელაციო სასამართლოში გაასაჩივრეს.