„ნაციონალური მოძრაობის“ ინფორმაციით დედაქალაქის მთავრობამ მომავალი წლის ბიუჯეტში კომუნალური ვაუჩერების დაფინანსება შეამცირა. საკრებულოს ოპოზიცია ამტკიცებს, რომ დაფინანსება ბიუჯეტში 8 მილიონი ლარით არის შემცირებული, რის გამოც 2015 წელს 23 ათასამდე ოჯახი მიიღებს შემცირებულ ვაუჩერს. ირაკლი აბესაძის თქმით დახმარება სოციალურად დაუცველ ოჯახებსაც შეუმცირდებათ.

„დავით ნარმანიას მორიგი, ძალიან ურცხვი ტყუილი და მავნებლური გადაწყვეტილება მიიღო თბილისელებისთვის ძალიან სამწუხაროდ - კომუნალური ვაუჩერი მომავალი წლიდან შემცირდა და როგორც ჩანს, გადაწყვეტილება გუშინდელი მთავრობის სხდომაზე მიიღო დავით ნარმანიამ. ნაცვლად 20 ლარისა, ოჯახები, სადაც ერთი სულია რეგისტრირებული, მიიღებენ 14 ლარს, ორსულიანები - 16 ლარს ხოლო სამ-სულიანი 19 ლარს,“ - განაცხადა ირაკლი აბესაძემ.

ამასთან დაკავშირებით განმარტება გააკეთა საკრებულოს უმრავლესობის წევრმა ჯაბა სამუშიამ, მისი თქმით აღნიშნული ინფორმაცია სიმართლეს არ შესაბამება და სოციალურად დაუცველი ოჯახებისთვის დახმარეგა გაორმაგდება.

„დასუფთავების ნაწილში მოხდა ცვლილება, საქართველოს პარლამენტის მიერ მიღებული გადაწყვეტილებით, სულადობაზე იქნა გადასული და თუ ამ შემთხვევაში, ოჯახში ცხოვრობს ორი სული, იხდიან ორი სულის გადასახადს. რაც შეეხება სოციალურად დაუცველ ოჯახებზე, პირიქით გაუორმაგდათ მათ ეს თანხა. მე მიკვირს, რომ „ნაციონალური მოძრაობა“ გვესაუბრება ამ თემაზე, იმიტომ, რომ სოციალური დახმარება გაორმაგებულია და გახდა 500 ლარი,“ --განაცხადა ჯაბა სამუშიამ.