„დემოკრატიული საქართველოს” ლიდერი ნინო ბურჯანაძე 2014 წელს საგარეო და შიდა პოლიტიკურ ნაბიჯებს წარუმატებელს უწოდებს.

მისი თქმით, 2014 წლის შეცდომებს საზოგადოება მომავალ წელს უფრო იგრძნობს.

„ეს იყო წარუმატებლობის და შანსის ხელიდან გაშვების წელი. 2014 წლის შეცდომებს მომავალ წელს უფრო ვიგრძნობთ. სამწუხაროდ, ხელისუფლება ნაცრის ქექვითაა დაკავებული და ეს ძალიან ცუდია. ჩვენ გავუშვით ხელიდან მნიშვნელოვანი მომენტები, რომელიც საქართველოს ტერიტორიული მთლიანობის აღდგენისათვის აუცილებელი იყო," - აცხადებს ნინო ბურჯანაძე.

მისი თქმით, ხელისუფლებამ უმუშევრობის და სახელისუფლებო სტრუქტურების გაძლიერების კუთხით პრობლემების მოგვარება ვერ შეძლო.

„ჩვენ მივიღეთ ის ხელისუფლება, სადაც წარმოდგენილნი არიან ის პოლიტიკური ძალები, რომლებიც მოსახლეობის მინიმალურ მხარდაჭერასაც არ იმსახურებდნენ და უკეთეს შემთხვევაში 5%-იან ბარიერსაც ვერ ლახავდნენ. დღეს ჩვენ ეს ძალები ჭკუას გვასწავლიან. გვუბნებიან, რომ ქართული საქმე რუსული საქმე ყოფილა. გვეუბნებიან, რომ საქართველოს სახელმწიფო ინტერესი რუსეთის ინტერესი ყოფილა. ივანიშვილის წყალობით კი მივიღეთ პარლამენტი, სადაც ხელისუფლებას რეალური უმრავლესობა უბრალოდ არ ყავს და ხელისუფლება მხოლოდ ფულზე და გარიგებაზეა დამოკიდებული“, - განაცხადა ბურჯანაძემ.