სასჯელაღსრულებისა და პრობაციის მინისტრმა, გიორგი მღებრიშვილმა ბათუმის #3 დაწესებულების დირექტორის წარდგენის შემდეგ ჟურნალისტებთან საუბრისას აღნიშნა რომ იგეგმება კიდევ სხვა საკადრო ცვლილებები, რომელიც სხვა დაწესებულებებსაც შეეხება.

მღებრიშვილის განცხადებით, დაგეგმილი რეორგანიზაციები, უწყების საქმიანობის გამჭვირვალობას და საზოგადოებაში პენიტენციალური სისტემის იმიჯის ამაღლებას ემსახურება. „ჩემი მთავარი პრინციპია, დავამსხვრიო სტერეოტიპი, რაც მუდმივად პრობლემა იყო ამ სისტემის - ჩაკეტილობა, გაუხსნელობა, დაფარული ინფორმაციები“.

"დღეს #3 დაწესებულების თანამშრომლებსა და მედიის საშუალებით საზოგადოებას ახალი დირექტორი წარვუდგინე. ჩემი მთავარი პრინციპია, დავამსხვრიო სტერეოტიპი, რაც მუდმივად პრობლემა იყო ამ სისტემის - ჩაკეტილობა, გაუხსნელობა, დაფარული ინფორმაციები. რაც საჯარო არის ყველასთვის ხელმისაწვდომელი იქნება. ისე ინიშნებოდნენ და იხსნებოდნენ დაწესებულების დირექტორები, რომ ამას ვერავინ ვერ იგებდა. მინდა, რომ მაქსიმალურად გამჭვირვალეები ვიყოთ", - განაცხადა გიორგი მღებრიშვილმა.

მისივე განმარტებით, ბათუმის #3 დაწესებულებაში 200-მდე პატიმარი იხდის სასჯელს და მათი პრობლემების შესახებ ინფორმაციას პირადად გაეცნობა.

"ინფრასტრუქტურულ პროექტებზე ყოველთვის მივანიშნებთ და ვაღიარებთ, რომ არის პრობლემები. ჩვენ გეგმაზომიერად ყველა პრობლემას ვაგვარებთ. დაახლოებით 200-მდე პატიმარი იხდის სასჯელს ამ დაწესებულებაში. პატიმრებს შევხვდები და მოვისმენ მათგან იმ პრობლემების შესახებ, რაც აწუხებთ. შევეცდებით, რომ მაქსიმალურად მოვუგვაროთ ყვლა პრობლემა. პატიმრებს უნდა მივაწოდოთ ის, რაც მათ ეკუთვნით, ასევე უნდა მივიღოთ მათგან ის, რაც გვეკუთვნის", - აღნიშნა გიორგი მღებრიშვილმა.