არასამთავრობო ორგანიზაცია „საქართველოს ევროპული არჩევანის“ ხელმძღვანელის არჩილ კბილაშვილის თქმით, პროკურატურის რეფორმირება რამდენიმე მიმართულებით არის აუცილებელი.

ამის შესახებ კბილაშვილმა სისხლის სამართლის რეფორმის უწყებათაშორისი საბჭოს გაფართოებულ სხდომაზე განაცხადა.

ყოფილი პროკურორის თქმით, „საქართველოს ევროპულმა არჩევანმა“ რამდენიმე დღის წინ გამართა პრეზენტაცია, სადაც იმ მიმართულებაზე ისაუბრა, სადაც რეფორმა ყველაზე საჭიროა.

„ეს არის მთავარი პროკურორის დანიშვნა-გათავისუფლების საკითხი, პროკურორის უფლებამოსილების გაზრდის საკითხი, პროკურატურის ორგანოებს შორის კომპეტენციათა განაწილების საკითხი, გამჭვირვალეობის და ანგარიშვალდებულების საკითხები. ასევე ბევრი სხვა თემა, რომელიც პროკურატურის რეფორმირებას უკავშირდება“, - განაცხადა კბილაშვილმა.