„ნაციონალური მოძრაობის“ წევრის დავით დარჩიაშვილის თქმით, პრემიერ-მინისტრმა დღეს გამართულ პრესკონფერენციაზე არაადეკვატური პასუხები გასცა.

როგორც „ნიუპოსტთან“ საუბარში დარჩიაშვილმა განაცხადა, ირაკლი ღარიბაშვილისთვის რეალურ პრობლემას „ნაციონალები“ წარმოადგენენ და მათზე კრიტიკით სურს პასუხგაუცემელი კითხვების გადაფარვა.

„მისი რეალური ცხოვრებისეული, იდეოლოგიური და პოლიტიკური პრობლემა არის სწორედ ოპოზიცია, „ნაციონალური მოძრაობა“. როგორც ჩანს ღამე აღარ სძინავს ამაზე ფიქრით. ის აგრესიული და გაუწონასწორებელი ახალგაზრდა კაცია. შესაბამისად, შეუფერებელია ამ თანამდებობისთვის. არაადეკვატურის, როდესაც რუსეთის პრეზიდენტზე ეკითხებიან და ამბობს, რომ სააკაშვილია საქართველოს მტერია. საერთოდ არც ერთ რეალურ საკითხზე ჩამოყალიბებული საკითხი არ აქვს. ამბობს, რომ რეფომრებს ვაკეთებო და ვერ აკონკრეტებს, რაში მდგომარეობს რეფორმა. უბრალოდ ილანძღება და მგონია, რომ ბიძინასთან გართულებული ურთიერთობები მის ფსიქიკურ მდგომარეობაზე მოქმედებს და გაუწონასწორებელი ხდება“, - ამბობს დარჩიაშვილი.

რაც შეეხება თავდაცვის სკანდალურ განცხადებაზე პრემიერის განცხადებას, დარჩიაშვილი ამბობს, რომ ირაკლი ღარიბაშვილი ცრუობს.

„ეს ადამიანი იტყუება, რომ თავდაცვის სამინისტრომ მასთან შეუთანხმებლად გააკეთა რამე. თავის ტყულებში თვითონვე იხლართება. მან თქვა, რომ ჩვენ უკრაინასთან გამიჯნულები ვართ. რას ნიშნავს ეს? რამდენჯერმე აიხლართა თავისივე ნათქვამში“, - განაცხადა დარჩიაშვილმა "ნიუპოსტთან" საუბარში.